የቻይናው ደራጎን (dragon can be translated to “zendo” like St. George killing zendo on his horse with a spear; also the image of zendo suggests that one day he will face the spear of Ethiopian people) (ጭራቅ) ከአፍሪካውያን ጅቦች ጋር አሸሸ ገዳሜ ጭፈረውን እያስነካው ነው፡፡ለዚህ (zendo) ደራጎን አፍሪካ በምንም መልኩ ተስማሚ ሁኔታ አትፈጥርለትም፡፡ታሪክ እንደሚያስረዳው በአንድ ወቅት የአፍሪካውያን መኩሪያና መመኪያ የነበረችው ምድር አሁን የጅቦች መሰባሰቢያ ትልቅ ዋሻ ፈጥራ (የአፍሪካ ሕብረት) የጅቦቹ መፈንጪያ መናሃርያ ሆናለች፡፡ለዚህ የጅቦች መገናኛ፤መዶለቻ፤መለመኛ፤ሕዝባዊ ማነቆ መፍተያው ሁሉ ለሚከናወንበት ግንባታ የሚያስፈልገውን ወጪ 200 ሚሊዮን የአሜሪካን ዶላር የተሸፈነው በቻይና ነው፡፡ ሲባልም፤ ይህ ቻይና ለአፍሪካ የሰጠችው የሰው በላዎቹ (ጅቦች) የአፍሪካ መሪዎችልመና መልስ ነው በማለት ጅቦቹ የታላቁን ye zendo ደራጎን ስጦታ ለማመስገን በተሰበሰቡበት ወቅት የተሰነዘረ አባባል ነው፡፡
(space between paragrpahs)
Indent to show quotation
ይህ ውብ ግንባታ………ከእንግዲህ የአህጉራችን የሕብረት አባላት የሚሰበሰቡበት ማዕከላዊ ቢሮ ሲሆን፤የተገነባውም በቀድሞው የሃገራችን ዓለም በቃኝ በመባል ይጠራ በነበረው ነፈሰ ገዳዮች፤ ሌቦች፤አስገድዶ ደፋሪዎች፤ፍትህን የሚያዛቡ፤አጭበርባሪዎች፤ወዘተ ይታሰሩበት በነበረበት የወህኒ ቤቱ ፍራሽ ላይ ነው፡፡ ይህ ታላቅና ግዙፍ ሕንጻ የሚያመላክተው የአህጉሪቱ መሪዎች ለዓመታት በሕዝብና በሃገር ላይ ጭነውት ያለው መከራና ስቃይ፤የነዚህ ሰው በላዎች የጅብነት ዘመን ማለቂያውንና እንደፈረሰው የወንጀለኞች ማጎርያ የነሱም የግዛት ዘመን አብቅቶ፤ አህጉሪቱና ሕዝቦችዋ ለዘመናት ከተጫነባቸው ሰቆቃ ነጻ የሚሆኑበት ዘመን መቃረቡን ነው፡፡ ስለዚህም ቻይና ይህን ግንብ ማስገንባቷ ትክክልና ተገቢም ነው፡፡ምክንያቱም ተከታዩ ዘመን የአፍሪካ ትንሳኤ ነውና፡፡ ዘመኑ ያለቀባቸውም በግፍ ሥልጣን ላይ ያለሕዝባዊ ፈቃድ የተጎለቱት መሪዎችም ለፍርድ የሚቀርቡበት ወቅት መዳረሻው በመሆኑ፡፡
(space)
ይህን የአፍሪካን ትንሳኤ የሚያመላክት አዳራሽ፤የአፍሪካን ራዕይ የሚጠቁመውን ግንባታ በመገንበታችሁ……… ለቻይና መንግስትና ሕዝብ ከፍተኛ ምስጋናችን ይድረሳችሁ፤ ይህ ግኑኝነታችንም ዘላቂነት ያለው ሆኖ በየጊዜው እንዲያብብ እንመኛለን ስልም የምናገረው ሁላችንንም በመወክል ነው፡፡
(space)
ስለቻይና መንግሥት ችሮታ ምስጋናውና ጫማ መላሱ መጨረሻ አልነበረውም፡፡‹‹ስጦታው›› በአፍሪካና በቻይና መሃል የተገነባውን ወዳጅነት በከፍተኛ ደረጃ እያደገ መሄዱን አመላካች ነው፡፡የአፍሪካ ሕብረት የወቅቱ ፕሬዜዳንትና ከ1979 አንስቶ የኤኳቶሪያል ጊኒ ፈላጭ ቆራጭ ፕሬዜዳንት ቴዎድሮ ኦቢያንግ ኢንጉዌማም በባለ 20 ባለመስታወት ፎቅ ላይ ሆነው መጪው በሚገባ ታየይቷቸዋል፤ለዚህም ነው…… የአዲሲቱ አፍሪካ የነገው ነጻ አፍሪካና አፍሪካውያን የብርሃን ፍናጣቂ፤ ለወደፊቷ አፍሪካ የምንፈልገው›› በማለት ሳይገባቸው እውነቱን የተናገሩት፡፡

Zendowum ደራጎኑም በበኩሉ ተስማምቷል!
‹‹………በቻይናና በአፍሪካ መሃል የቆየ ልማዳዊና ባሕላዊ ግንኙነት አለ፡፡ቻይና ምንጊዜም ቢሆን የአፍሪካ ጥሩ ወዳጅ፤መልካም አገር፤እና ታማኝ ወንድም ነች፡፡አንድነትና መረደዳት ልማታዊ ድጋፍ በቻይናና በአፍሪካ መሃል የኖረና ወደፊትም ቢሆን ዘለቄታ ያለው እንዲሆን እቅዳችን ነው፡፡ ……. ሠላም መረጋጋትና ልማት ቅድሚያ ትኩረት ልንሰጠው የሚገባን ነው፡፡ በሁለተኛ ደረጃም አፍሪካውያን ችግራቸውንና አለመግባባታቸውን በራሳቸው እንዲፈቱ ምርጫቸውን እናከብራለን፡፡ በአፍሪካ የውስጥ ጉዳይ በራስ ወዳድነት በመነሳትና የራስን ጥቅም በማስቀደም መግባት ችግሩን በመፍታት ፈንታ ይበልጡን ያወሳስበዋል፡፡ ሶስተኛም አፍሪካውያንን በህብረት ጥንካሬያቸውን እንዲያጎለብቱ ድጋፋችን አይለያቸውም፤አራተኛ የአፍሪካን ልማት በማስቀደም የበለጠ ድጋፍ ልናደርግ ተገቢ ነው፡፡ በቻይና አፍሪካ ወዳጅነት ዕድገት ሂደት ውስጥ ጣልቃ አለመግባትንና የየሃገራቱን ልእልና አክብረን በውስጥ ጉዳያቸውም ላላመግባት ውሳኔያችንን እናከብራለን……….ለአፍሪካ ከምናደርጋው ድጋፍ ጋር የፖለቲካን ክር እንደማነቆ ጨርሶ አናያይዝም……….የአፍሪካንና የቻይና ግንኙነት ይበልጥ ለማጠናከርም ከምንም ነጻ የሆነ የ600 ሚሊዮን ብር እርዳታችንን ለአፍሪካ ሕብረት በሚቀጥለው ሶስት ዓመታት ውስጥ ተግባራዊ እናደርጋለን፡፡››
በአፍሪካ የ‹‹ቻይና ሞዴል››
የአፍሪካ ፈላጭ ቆራጭ ገዢዎች በቻይና ሞዴል የኤኮኖሚ ልማት በሚለው መርሃ ግብር ላይ የእኔ እቀድም እኔ እቀድምና የቻይና ፍቅር ለእኔ ለእኔ ማለትንና መሽቀዳደምን እንደፈሊጥ ይዘውታል፡፡ የሕዝብን ይሁንታ አግኝቶ የማያውቀውና የኢትዮጵያ ፈላጭ ቆራጭ ገዢው መለስ ዜናዊ የቻይና ሞዴል የሚለውን በመከተል ታማኝነቱን አረጋግጧል፡፡
(space)
ሁላችንም ስንመኘውና ስንጓጓለት የነበረው የአፍሪካ ትንሳኤ እውን ለመሆን መንገዱን ጀምሯል፡፡ለዚህም ማስረጃ ሊሆን የሚችል አልኩ ባዮችና ምሁራን በአደባባይ ስለአፍሪካ ዳግም ወደ ቅኝ ግዛትነት መመለስን ሲያውጁ ቢከርሙም አሁን ግን መታቀብ ግድ ሆኖባቸዋል፡፡ የአህጉራችን ይህ ውብና ድንቅ ሆኖ የታነጸው አዲሱ ማከላችን የአፍሪካ ሕብረት በትግላችን መሀላ በመተግበሩ የአፍሪካን ትንሳኤ አመላካች ነው፡፡
የቻይና ሞዴል ማለት ግን በእርግጠኝነት ምንድን ነው?
የአፍሪካ ፈላጭ ቆራጭ ገዢዎች የቻይና ሞዴል የሚለውን ቃል በግልጽና በትክክል ለማስረዳት ፈቃደኛ ከመሆን ይልቅ፤ እንደ ኮከብ ቆጣሪና መወድስን እንደማያውቀው አጭበርባሪ ጠምጣሚ ከንፈራቸውን በማላወስ ብቻ ያልፉታል፡፡ እነዚህን ፈላጭ ቆራጭ ሰው በላ ጅቦች የማመን ትንሽም ቢሆን ፈቃደኝነቱ ካለን፤‹‹የቻይና ሞዴል አፍሪካን ከተጫናት ድህነትና ችጋር አላቆ፤ የሕዝቡን መሰረታዊ ፍላጎት አሟልቶና ነጻነቱን አስረክቦ፤በኢኮኖሚና በኢንዱስትሪው ዘርፍ እድገቱን ለማፋጠን የሚያስችል ነው፡፡››ቻይና የዓለም የኦኖሚ ሃይል ልትሆን የበቃችው፤ ለሃገር ውስጥና ለውጭ ተወላጆች ኢንቬስተሮች በሯን በመክፈትና ታክስን በመቀነስ፤ አስፈላጊ በሆኑትም ሂደቶች የጋራ አዋ|ጪ (spelling)በመሆን፤እንዲሁም የጉልበት ሥራን ሰፋ በማድረግ ነው፡፡ይህ ነው ለቻይናና ለአፍሪካ የእኩል በእኩል ሁኔታን ይፈጥራል የሚባለው፡፡
እዚህ ላይ ግን አንድ ማነቆ ተቀምጧል፡፡ ቻይና ይህን እመርታ ልታሳይ የሄደችበት መንገድ እኮ ማንኛውንም ጉዳይ በአንድ ፓርቲ ስርአት ውስጥ ጠፍራ በመያዝና፤ማንኛውንም እንቅስቃሴ፤የሲቪል ማህረሰቡንም፤ ወታደራዊ ተቋማትን፤የደህንነቱን መዋቅር፤በአጠቃላይ ስርአቱ ሥር ያሉትን ሁሉ የመንግሽትን ጥቅምና ፍላጎት፤ ደህንነት ጠባቂዎች በማድረግና ሕዝቡን በማግለል የሕዝቡን የእለት ተእለት እንቅስቃሴና ሃሳቡን የመግለጽ ፍላጉተቱን ሁሉ መቆጣጠርያና የቅድሚያ ማክሸፊያ መዋቅር በመዘርጋት ነው፡፡

ስለ የቻይና ሞዴል ወደ አፍሪካ ስለመምጣቱ ጉዳይስ ቻይና ምን እሳቤ አላት?

‹‹ብዙ እሳቤ የለንም›› ይላሉ በአፍሪካ ጉዳይ ልዩ የቻይና ወኪል የሆኑት ሊዩ ጉጂን በእርግጠኝነት ሲገልጹ ‹‹አሁን እያደረግን ያለነው ልማዳችንን ማካፈል ብቻ ነው፡፡እውነት እላችኋለሁ እመኑኝ ቻይናውያን የፖለቲካ እምነታችንን፣ የአገዛዝ ስርአታችንን፤ ወደ አፍሪካ እንደውለታ ክፍያ ለማስተላለፍ ሃሳብም ሆነ ፍላጎት የለንም፡፡ እኛ ራሳችን ገና ሞዴላችን የዳበረና የተዋጣለት፤ ብቃቱ የተረጋገጠለት የቻይና ሞዴል ነው ብለን አናምንም››
ታዲያ የቻይናውያን መሪዎች እምነታቸው ይህ ከሆነ፤ በአፍሪካ ፈላጭ ቆራጭ ገዢዎች ሞዴል እያሉ የሚያጨበጭቡለትንና ሰማየ ሰማያት እያወጡ የሚጨፍሩለትን ሞዴል ባለቤቶቹ ገና ያላደገ ያልለማ፤… ነው የሚሉትን ሞዴል ይዘው አሸሸ ገዳሜ የሚያምቧርቁት? ምናልባት እነዚህ ደም መጣጭ የሆኑ የአፍሪካ ዲክታተሮች የቻይና ሞዴል የሚሉትን እንደአይነርግብ መከለያቸው በማድረግ ኢኮኖሚውን ከአፍሪካ ጥገት አላበው ለመጨረስ ማስመሰያ የእድገት መስመር አድርገውት ይሆን?‹‹ቀልቀሎ ስልቻ ስልቻ ቀልቀሉ›› እንዲሉ አይነት ነው እንጂ የ‹‹ቻይና ሞዴል›› ያው እንዳለው ye and gezi የአንድ ፓርቲ ስርአት ከ1960 የቅኝ ግዛት ማነቆ ወጡበት ጊዜ ጀምሮ የነበረና ያለ ነው፡፡የዩጋንዳው ዩዌሪ ሙሴቪኒ፤የሩዋንዳው ፖውል ካጋሚ፤የ86 ዓመቱ የዝምባዌው ሮበርት ሙጋቤ የግዛት ዘመናቸውን ለማራዘም የተጠቀሙበት ሞዴል ነው አሁንም ተመልሶ የቻይና ሞዴል ተብሎ የሚለፈፈው፡፡ባለፉት የፍቅር ወቅቶች መለስ፤ሙሴቪኒና ካጋሚ (በክሊንተንና በብሌር ይሁንታ በተጫነላቸው ክብረ ዘውድ) ‹‹የአዲሲቱ አፍሪካ አዲስ ትውልድ መሪዎች›› በመባል የግዛት ዘመናቸውን ለማራዘም እንዲችሉ ተብሎ ይጠሩበት ነበር፡፡አሁን ደሞ የምእራቡ ዓለም መልእክተኞችና ጉዳይ ፈጻሚ በመሆን በየተላኩበት ሰብአዊ መብትን በመግፈፍ፤ የሕግን ልዕልና በመድፈር፤ ሰብአዊ መብትን በመጣስ የተልእኮ ክፍያቸውን ግብር ከፋዩ ሕዝብ በማያምንበት ቦታ እንዲውል እየተደረገ ለነዚህ ሰው በላ ፈላጭ ቆራጮች የአገልጋይነታቸውን እየተከፈሉ ነው፡፡ create paragraph here)
በሌላ በኩሉ ግን ጉዳዩ ያሳሰባቸው ሁሉ ስለነዚህ አፍሪካውያን አገልጋዮች ተግባር በአግባቡ ከማጋለጥና አለአግባብ ከሕዝብ የሚሰበሰብም ክፍያ መቆም እንዳለበት ትግላቸውን አላቆሙም፡፡የአንድ ሰው ለገዢነት የአንድ ፓርቲ መመሪያነት ተጨፍልቆና አዲስ ስመ ጥምቀት ተሰጥቶት አሁን ‹‹የቻይና ሞዴል›› የሚባለው ቀደም ሲል ክዋሚ ንክሩማህ የሰብ ሰሃራው አፍሪካ መሪ ሞክሮት ተስፋ በሚያስቆርጥ መልኩ የከሰፈ (keshefe) ተሞክሮ ነው፡፡ንክሩማህ ልክ እንዳሁኑ ወቅታዊው የቻይና ሞዴል አራጋቢ ብርማ መሳይ ምላስ፤ ንክሩማህም በዚያን ወቅት ኒኦ ኮሎኒያሊስምን (ንክሩማህ የፈጠረው የማስጠያ ቃል) እና ኢምፔሪያሊዝምን አፍሪካን በመበዝበዛቸውና ለድህነት በመዳረጋቸው ይረግምና ያወግዝ ነበር፡፡ የንክሩማህ ፈጣን የኢንደስትሪያላይዜሽን ፕሮጋራም ጋናን ከውጭ ምጸዋትና እርዳታ፤ በሀሃገሪቱ የካካዋ የዓለም ግብይት ላይ ከፍተኛ ውድቀት አድርሶ ነበር፡፡ሌሎችም ተግባራዊ ያደረጋቸው የኤኮኖሚ ልማት እቅዶችም በማያዳግምና ትንሳኤ በሌለው መልካቸው ለውድቀት ተዳረጉ፡፡
በ1966 ዓም በወታደራዊ መፈንቅለ መንግስት ከስልጣን በወረደበት ጊዜ ጋና በአፍሪካ ከፍተኛ ሃብታም ከመባል ደረጃ ወርዳ Ghana ዝቅተኛ የችጋር ሃገር ሆና ነበር፡፡በተመሳሳይም በአፍሪካ ከፍተኛ የእርሻ ምርት ውጤት ላኪነት አሽቆልቁላ ወደ ከፍተኛ የእርሻ ምርት ውጤት ገዢነት ወርዳለች፡፡የአንድ ሰው አንድ ፓርቲ መኖር እንደብሔር ግጭት አስወጋጅ፤የዘር ግጭት ፈጪ ከመሆን ይልቅ በይበልጥ አጉልቶ ያሳየው የጭግሩ አባባሽና የግጭቶቹ አመንጪና አባባሽ መሆኑን ነው፡፡እንዲያውም ከበርካታ ተሞክሮዎች እንደታየው የዚህ አገዛዝ ዋናው ተግባር እነዚህን ችግሮችና ግጭቶች በመፍጠር በሕብረተሰብ መሃል አለመግባባትና ግጭት ተጠናክረው የሃገሮች የአንድነት ነቀርሳ እንዲሆኑ ማድረግ መሆኑ ታይቷል፡፡ይህ እውነታም በአፍሪካ አህጉር ከሃገር ሃገር እንደ ሰደድ እሳት በመያያዝ ተዳርሶ የሃገሪቱን መኩሪያን ታሪካዊነት የሚመሰክሩትን፤ የውጭ ጎብኚዎችን የሚስቡትን የዱር አራዊት ጭምር ለስደትና ለርሃብ ዳርጓል፡፡ያም ሆኖ ግን የአፍሪካ ፈላጭ ቆራጭ ገዢዎች፤የወታደራዊ ጁንታ ገዢዎች፤አለ ያሉትን ዘዴያቸውን ሁሉ አንድ ገዢ አንድ ፓርቲ ያለውን ጠቀሜታ ለማሳመን የቱንም ያህል ቢፍጨረጨሩ ውጤቱ ግን ከገሃዱ እውነታ ሊያልፍላቸው አልቻለም፡፡ያም እውነታ ባለብዙ ፓርቲ መሆንን ብቻ ማዋጣቱንና ጠቀሜታው ነው፡፡ አሁን ያሉት ፈላጭ ቆራጭ የአፍሪካ እርባና ቢስ ገዢዎች ደግሞ እንደገና ወደ ኋላ መልሰው አፍሪካን ሊገድል ማነቆ አስሮባት ሲያስጨንቃትና አላላውስ ብሎ እንደግመል ሽንት ወደኋላ ሲጎትታት የኖረውን ስርአት ሊያመጡ ያረጀውንና የአግልግሎት ዘመኑን የጨረሰውን የማይላስ የማይቀመሰውን ጉዳይ በአዲስ ካባ ደርተው ‹‹ምርጡ የቻይና ሞዴል›› ብለው ሊያለብሱን ይዳዳቸዋል፡፡ያንኑ ተዝካሩ የተባላውን አንድ gezhi ሰው አንድ ፓርቲ፡፡
የ‹‹ቻይና ሞዴል›› በአፍሪካ ያለው ሁኔታ
መለስ ዜናዊና ሌሎቹ የተባበሩት የአፍሪካ ፈላጭ ቆራጭ ገዢዎች ይህን ገና ‹‹እምቦቀቅላ›› የሆነውን ‹‹ቻይና ሞዴል›› በእውነት መልኩ እየተቀበሉትና እየተከተሉት ነው? የሃገር ውስጥና የውጪ ኢንቬስተሮች በአፍሪካ ሥራቸውን ለማከናወን ነጻ እንቅስቃሴና ትግበራ አላቸው? ባልተብብራሩና ምንነታቸው በግልጽ መረዳት በማይቻል፤ ባቃዣቸው ቁጥር በሚወጡ ደንቦችና መመርያዎች ሳይታሰሩና ለችግር ሳይዳረጉ ይንቀሳቀሳሉ? እውቀት የለሽ የባለስላጣኑ ጃዊሳዎች ሳይጎሽሟቸውና መላ ቅደሱን ሳያጠፉባቸው ድርጅቶቻቸውን ይነራሉ? የነገው አዋጅና ደንብ ምን ይለን ይሆን ብለው ከማሰብ ይልቅ ለገበያው አስፈላጊው፤ ለፈላጊው ጠቃሚው ምን ይሆን ብለው ማቀድስ ይችላሉ? ለመሆነጁ በኢትዮጵያ ካለው ሥራ ውስጥ ስንቱ ነው ለመደራደር በሚያመችና ግልጽ በሆነ መመርያ የታቀፈው የኢንቬስትመንት አካል? የ2011ዱ የዓለም ባንክ ያወጣውና 183 ሃገራትን የፈረጀበት መመዘኛ (The 2011 World Bank Ease of Doing Business Index) በኢትዮጵያ ያሉትን ሁኔታዎች መመዘኛው በአሳዛኝ ደረጃ ላይ ያስቀምጣል፡፡በአጠቃላይ ግምገማው 111ኛ ያደርጋትና፤”ሥራን ለመጀመር (99) የግንባታ ፈቃድ ለማከናወን (56) የመብራት ተጠቃሚ ለመሆን (93) ንብረትን ለማስመዝገብ (113) ብድር ለማግኘት (150) ኢንቬስተሮችን ጥቅም ማስጠበቅ (122) ታክስ ለመክፈል (40) ወደ ውጭ ገበያ ለማቅረብ (157) ውልን ማስከበር (57) አለመግባባትን ለመፍታት (89)

የ‹‹ቻይና ሞዴል›› ለመለስ ዜናዊና ለግብረአበሮቹ ፈላጭ ቆራጮች በስልጣን ለመቆየት የሚያጠልቁት ጭንብላቸው ነው፡፡ ይህንኑ ጭምብል ደሞ በሕዝቡ አመለካከት ላይ አጥልቀው እውነቱን እንዳያውቅ ሊያደርጉታ ይሞክራሉ፡፡ ይህን በማድረግም ግልጥነትና ተጠያቂነት እንዳይኖራቸው፤ተወዳዳሪና ተቀናቃኝ ያሉበት ነጻና ፍትሃዊ ምርጫ እንዳይኖር፤ሕዝቡ የንብረት ባለቤትነት መብት እንዳይኖረውና ሁል ጊዜ የስርአቱ ለማኝና የሃገሩ ባይተዋር እንዲሆን፤ሃሳብን በነጻነት እንዳይገልጽ፤ነጻ ፕሬስ እንዳይኖር፤የፍትህ አካላት ታዛዥነታቸው ለፍትህ ስርአቱ ሳይሆን ለገዢዎች ጥቅም ማስጠበቂያ እንዲሆን የሚያደርጉትን ጸረ ህዝብና ጸረ ሃገር ድርጊታቸውን ለመሸፈን ይጠቀሙበታል፡፡ በዚህ ድርጊታቸው ሕዝቡ የስርአቱ ተገዢና አገልጋይ እንዲሆን፤ ለመቆጣጠርያነት ፖለቲካውን በማነቆነት በማስቀመጥ፤ ኤኮኖሚውን ተብትበው በማሰርና በኪሳቸው በመክተት ሃገሪቱን ለችጋርና ለምድረባዳነት፤ ሕዝቡን ለመከራ ስቃይና ኑሮን ለመጥላት ማድረጊያነት ሆን ብለው ይጠቀሙበታል፡፡የ‹‹ቻይናን ሞዴል›› የኤኮኖሚ ልማትን በመቃዠት ደረጃ እያራገቡ የፖለቲካ ነጻነትን በገሃድ ለመጨፍለቅ የሕዝቡን ዴሚክራሲያዊ ነጻነት መርገጥ ስለሚያስችላቸው ሕዝቡን በዚህ እያማለሉ የሃገሪቱን ብሔራዊ ኤኮኖሚ በግላቸው ይመገምጉታል፤ያደርቁታል፡፡
(space)
በቅርቡ፤ፋይናንሻል ግሎባል ኢንተግሪቲ ሲጽፍ፡- ‹‹ ……ኢትዮጵያዊያን ደማቸው ተመጦ ተመጦ ባዷቸውን እየቀሩ ነው፡፡ከአዘቀጠው የድህነት አረንቋ ለመውጣት ምንም ያህል ቢጠሩና ቢድሁ ዋናቸው ወንዙ ወደሚፈስበት ሳይሆን ወደሚመነጭበት ስለሆነ እስከማዕዜኑ ከዚያ መውጣት ዘበት ነው፡፡›› ይህ ነው እንግዲህ ለኢትዮጵያና ለአብዛኛዎቹ የአፍሪካ ሃገራት የ‹‹ቻይና ሞዴል›› የሚባልላቸው፡፡

Continue reading …

በሽብርተኝነት ስም በእስር ላይ ሚገኘው የአንድነት ፓርቲ የህዝብ ግንኙነት ሃላፊ አቶ አንዱአለም አራጌ ቃሊቲ በሚገኘው እስር ቤት ውስጥ በተቀመጠበት በታህሳስ 7 ቀን 2004ዓ.ም ከቀኑ 8 ሰዓት አካባቢ ድብደባ እንደተፈፀመባቸው ለጠያቂዎች ገለፁ፡፡ ፊታቸው ላይም ጠባሳው የሚታይ ሲሆን ጭንቅላታቸው አካባቢም ከፍተኛ ጉዳት ደርሶባቸዋል፡፡
አቶ አንዱአለም ለወንድሙ አቶ አብርሀም አራጌ በብስጭት እንደነገሩት በማረሚያ ቤቱ የተቀነባበረና የታቀደ ጥቃት እየተፈፀመባቸው እንደሆነ ጠቁመው ለማስረጃ የሰበሰቡዋቸው ወረቀቶችም ሆን ተብሎ ክፍላቸው አብሮ እንዲታሰር በተደረገ ግለሰብ ተወስደዋል፡፡ ‹‹በዚህ ጉዳይ ብበሳጭም የግለሰቡ ተልኮ ስለገባኝ ዝም ከማለት ውጭ ምንም አላልኩም፡፡›› ያሉ ሲሆን እንደገና ‹‹በተቀመጥኩበት ሳላስበው በቦክስና በእርግጫ በግለሰቡ ተደብድቤያለሁ፡፡ ህይወቴን ያተረፉትም አቶ በቀለ ገርባ ናቸው፡፡ ለማረሚያ ቤቱ አቤት ብልም መፍትሄ ሊሰጡኝ አልቻሉም፡፡ በዚህ አይነት ለህይወቴም እንደሚያሰጋኝ እና በዚች ሀገር ላይ አየተፈፀመ ያለውን ግፍ የኢትዮጵያ ህዝብ እንዲያውቅልኝ እጠይቃለሁ፡፡›› ብለዋል፡፡

 

Contact Fnote Gazeta: fnotenetsanet@yahoo.com

Continue reading …

  PDF- የአፍሪካ ሕብረት ህንጻ ከፕሮፌሰር ዓለማየሁ ገብረማርያም ትርጉም ከነጻነት ሃገሬ

 

Continue reading …

በጋምቤላ ክል  በምስጢር የደኅንነት አባል ሆነው ይሠራሉ የተባሉት አቶ ጌታቸው አንኮሬ ባልታወቁ  ሰዎች  በድንገት  መገደላቸውን  ተከትሎ  ቀደም  ሲል  በክልሉ  የነበረው  ውጥረት  በከፍተኛ  ደረጃ መባባሱ  ተገለጸ።  የክልሉ  ባለሥልጣናትና  ካድሬዎችም  ስጋት ላይ  ወድቀዋል።   Read more…

Continue reading …

[caption id="attachment_11841" align="aligncenter" width="600" caption="OLF Meeting - Kelly Inn Saint Paul Hotel"][/caption]

 በሄኖክ አለማየሁ /zehabesha.com

ለአንድ ለሁለት ሳምንታት ጋብ ብሎ ባልተለመደ መልኩ ጠፍቶ የነበረው የሚኒሶታ በረዶ ትናንት ማምሻውን አዲስ ዓመትን እየተቀበልን ባለበት ሰዓት መስታወት የመሰለ በረዶ ጥሎ ከተማዋን ነጭ በነጭ አድርጓታል። ነጭ ደግሞ የሰላም፣ የደስታና የአንድነት መግለጫ ነው። የኦሮሞ ነጻነት ግንባርም በሚኒሶታ ከኢትዮጵያውያን ጋር ባደረገው ሕዝባዊ ስብሰባ ታሪካዊ ውሳኔዎችን በማስተላለፍ አዲሱን ዓመት ልክ እንደሚኒሶታ አየር ጠባይ በነጭ እንድንቀበለው አድርጓል።

የኦሮሞ ነጻነት ግንባር ከሕዝብ ጋር ለመወያየት በጠራው ስብሰባ ላይ የመክፈቻ ንግግር ያደረጉት በቪዲዮ ጄነራል ጀማል ገልቹ ነበሩ። ጄነራሉ ንግግራቸውን የጀመሩት እስካሁን በኦሮሞ ነጻነት ግንባር ስር ሆነው ለታገሉና ለተሰው ታጋዮች ያላቸውን አክብሮት በመግለጽ ግንባሩ እስካሁን ያደረገውን የትግል እንቅስቃሴ መርምረዋል።

ከዛም በኋላ በአሁኑ ወቅት ኦነግ ኢትዮጵያዊነቱን ተቀብሎ ለመታገል ለምን እንደወሰነ ለተሰብሳቢው አስረድተዋል። ጀነራል ከማል “እስካሁን ድረስ የኦሮሞ ሕዝብ ሲነገረው የነበረው ትክክል አልነበረም። አሁን ግን እውነቱን እየነገርነው ነው። ድሮ የኦሮሞን ሕዝብ ኢትዮጵያዊ አይደለህም እየተባለ ነበር። እውነቱ ግን የኦሮሞ ሕዝብ የኢትዮጵያ ግንድ ነው። እንዴት ነው ግንድ ከሆነበት የሚገነጠለው? “ ሲሉ ንግግራቸውን ቀጥለው “በአዲሱ የትግል አቅጣጫ ከሁሉም ኢትዮጵያውያን ጋር በመተባበር የተሻለች ኢትዮጵያን ለመፍጠር እንታገላለን። ኦነግ አሁን ይህንን አዲስ የትግል አቅጣጫ የቀየሰው ዘመኑንና የዚህን ትውልድ አመላለከትና ተጨባጭ ሁኔታዎችን በመገንዘብ ነው” ያሉት ጄነራል ከማል ገልቹ “ትግላችን ኢትዮጵያን ለመምራት ሳይሆን የኢትዮጵያን ሲስተም በተሻለ ሲስተም መቀየር ነው” በማለት አሁን ያለውን የውሸት የወያኔ ፌደራሊዝም ወደተሻለ ፌዴራሊዝም መቀየር ነው አላማችን ብለዋል።

“ሕዝቦች እየተጨቆኑ ነው፤ ተከፋፍለን መታገል የወያኔን ዕድሜ ማራዘም ነው” ያሉት ጀነራሉ “አዲስ እውነተኛ ዲሞክራሲያዊት ሃገር ኢትዮጵያን ለመገንባትና በጋራና በእኩልነት ለመኖር የአድነት ግንባር እንፍጠር” በማለት በሃገር ቤትም ሆነ በውጭ ሃገር የሚገኙ ሁሉም የፖለቲካ ፓርቲዎች ጋር ተባብሮ ለአንድ ኢትዮጵያ የሚታገሉበትን ጥሪ አቅርበዋል። በዚህም ወቅት አዳራሹ በጭብጨባ ናኝቷል።

በስብሰባው ላይ የተገኙ የኦሮሞ ብሄር ተወላጅ ኢትዮጵያውያን አሁን ኦነግ በወሰደው አቋም እጅጉን መደሰታቸውን በመግለጽ “የኦሮሞ ባህላችን እና ቋንቋችን እስከተከበረ ድረስ እነዚህን መሪዎቻችንን ያመጡልንን ቅዱስ ሃሳብ ልንቀበል ይገባል” የሚሉ አስተያየቶችን ሰጥተዋል። በመድረኩም በኦነግ አዲሱ የትግል አቅጣጫ ዙሪያ ጥያቄዎች ቀርበዋል። ከነዚህም መካከል በተለያዩ የተቃዋሚ ፓርቲዎች ተመስርቶ ስለነበረው ኤኤፍ ዲ፤ ከግንቦት ሰባት ጋር አብሮ ስለመሰራት፤ እንደዚሁም ስለሌሎች በርከት ያሉ ጉዳዮችና ስለአዲሱ የኦነግ የትግል አቅጣጫ ጥያቄዎች ቀርበው መድረኩን ሲመሩ ከነበሩት የኦነግ የማ ዕከላዊ ኮሚቴ አመራር አባል አቶ ተማም ባቲ እና ከድርጅቱ ዋና ጸሃፊ አቶ አሚን ጁዲ ምላሽ ተስጥተዋል።

“የኦነግ የትግል ዓላማ መመሪያ እንጂ መተዳደሪያ አይደለም። መተዳደሪያውን የሚመርጠው ሕዝብ ነው።” ያሉት አቶ ተማም ባቲ “በኢትዮጵያ መልካም አስተዳደርን ለመፍጠር ከሁሉም ኢትዮጵያውያን ፖለቲካ ፓርቲዎች ጋር አብረን እንሰራለን። አሁን ያለው ስርዓት የብሄር ብሄረሰቦችን መብት እያስከበርኩ ነው ቢልም ውሸት ነው። ትክክለኛውን የሕዝቦች መብት ለማስከበር መነሳትና በአዲስ ሃሳብ አንድ ሆነን እንታገላለን” ብለዋል።

የግንባሩ ዋና ጸሃፊ አቶ አሚን ጁዲ “እስካሁን ድረስ ከማንም ጋር ግንባር አልፈጠርንም። ግን የራሳችንን ፕሮግራም ስንቀርጽ ነበር የቆየነው። ይህንን ዛሬ የወሰድነውን አቋም ማንንም ለማስደሰት ስንል አይደለም የወሰድነው። ለኢትዮጵያ መልካም አስተዳደር ያስፈልጋታል፤ የብሄር ብሄረሰቦችን መብት እንደወያኔ የውሸት ሳይሆን በትክክል የሚያስከብር ስርዓት መፈጠር ስላለበት ነው ይህንን ውሳኔ የወሰንነው።” በማለት አሁን ኦነግ የወሰደውን አዲስ አቋም አስረድተዋል።

“አሁን ያለው የወያኔ ፌደራሊዝም የኦሮሞን ሕዝብም ሆነ የሌላውን ሕዝብ መብት እያስከበረ አይደለም። አሁን ያለው ሲስተም በየሁለት ዓመቱ ጁነዲን እየተባረረ፣ አባዱላ እየተተካ፤ ኩማ እየመራ እየሄደ የመለስ ዜናዊን የቤት ሥራ ይሰራል እንጂ ምንም ዓይነት የሕዝብ ውክልና የለውም” ያሉት አቶ አሚን “የኛን መብት ከሚያስከብር ና ከሚያከበር ሁሉ ጋር አብረን እንሰራለን።” ብለዋል።

አቶ አሚን ንግግራቸውን ቀጥለው “የወያኔ አንቀጽ 39 (የብሄረሰቦች መብት እስከመገንጠል የሚለው) መሸንገያ አንቀጽ እንጂ የብሄረሰቦችን መብት ያስከበረ አይደለም። ሕገመንግስቱን ስትመለከቱት ይህንን አንቀጽ የሚያፈርሱ በርካታ ነገሮችን አስቀምጧል” ያሉት አቶ አሚን “አጼ ምኒልክ እና አጼ ሃይለ ሥላሴ ለሰሩት ጥፋት የልጅ ልጆቻቸው መጠየቅ የለባቸውም። ያለፈውን ታሪክ የመጽሀፍ መደርደሪያ ላይ አስቀምጠን አሁን ይህኛው ትውልድ አዲስ ታሪክ ለመጻፍ መዘጋጀት አለበት እንጂ በአያቶቹ ጥፋት የሚከሰስ ትውልድ መኖር የለበትም። በዘር ተከፋፈሎ እንደዚህ ስንባል ነበር እየተባሉ መለያየት የሚጠቅመው አሁን ላለው የወያኔ ስር ዓት እንጂ ዲሞክራቲክ ትግሉን አይደለም። የኦሮሞ ሕዝብ አዲስ ትውልድ አመለካከቱ በጣም እያደገ ነው። ከኢትዮጵያ ብሄር ብሄረሰቦች ጋር ተባብሮ በአንድነት ተስማምቶ የሚኖርበትን ሁኔታ ይፈልጋል። ስለዚህ በጋራ በአንድ ኢትዮጵያዊነት ስር የሚያኖረንን ስልት መከተል አለብን” ሲሉ ተናግረዋል።

ዛሬ በሚኒያፖሊስ የተጠራው ስብሰባ ሁሉንም ኢትዮጵያውያን እንዲያሳትፍ ቀድሞ የታቀደ ቢሆንም ትናንትና ከትናንት በስቲያ ዲሴምበር 30 እና 31 የድርጅቱ አመራር አባላት በዝግ ባደረጉት ስብሰባ ከሁሉም ኢትዮጵያውያን ጋር በአንድነት ስብሰባ ከመጠራቱ በፊት የኦሮሞን ሕዝብ በቅድሚያ ማሳመን አለብን በሚል ተወስኗል። በዚህም መሰረት በቅርብ ቀን ትልቅ የኢትዮጵያውያን ስብሰባ እንደሚጠራ ኦነግ አስታውቋል። በዛሬው እለት ኦነግ ኢትዮጵያዊነቱን አምኖና ተቀብሎ ለአዲስ የትግል ስልት መዘጋጀቱን በርከት ያሉ የስብሰባው ታዳሚዎች ካለመንም ተቃውሞ ደግፈው ለስራ ተዘጋጅተዋል። ስብሰባው ከተጠናቀቀ በኋላም እንኳን ደስ ያለን እየተባባሉ እንደነበር የዘ-ሐበሻ ጋዜጣ አዘጋጅ ተመልክቷል።

ስብሰባው በኦሮሞ ኢትዮጵያውያን ብሄረሰብ ባህል መሰረት በአባቶች ምርቃት ነበር የተዘጋው። ትላልቅ አባቶች ባደረጉት ምርቃትም አዲሱ የትግል አቅጣጫ ከግብ እንዲደርስ ምኞታቸውን ገልጸዋል።

በስብሰባው ላይ ከተሳተፉት ኢትዮጵያውያን መካከል አንዱ የሆነውና በሚኒሶታ የሚኖረው ፉአድ አባነሻ ለዘ-ሐበሻ በሰጠው መግለጫ “እኔ እስካሁን ድረስ ባረጀው የኦነግ ሃሳብ ላይ ነበርኩ። የቀድሞው ትግል ስልት ጥሩ አለመሆኑን ተረድቻለሁ። እስካሁን ለወያኔ ተመቻችተን ነበር የተቀመጥነው። የሚያዋጣው አንድ ሆኖ በአንድ ላይ መታገልና አብሮ መኖር ነው። በዛሬው የኦነግ አዲስ የትግል ስልት በጣም ተደስቻለሁ። በጋራ ታግለን ሃገራችንን ከወያኔ ነጻ እናወጣታለን” ብሎናል።

የኦነግን መግለጫ ለማንበብ የሚከተለውን ይጫኑ  - OLF_National_Council_Press_Release_final (1)

 

 

http://www.zehabesha.com/

Continue reading …

ጠያቂው- መምህር የኔ ሰው ራስህን መስዋእት ለማድረግ ዝግጅትህን ባጠናቀክበት በዚህች የመጨረሻ ሰአት  ቃለ ምልልስ ለምድረግ ስለፈቀድክልኝ ከልብ አመሰግናለሁ።

የኔሰው፤- እኔም አመሰግናለሁ እድሉን ስላገኘሁ።

ጠያቀው፡- የኔሰው በአሁኑ ሰኣት ራስህን መስዋእት ለማደርግ ቆርጠህ ወደዚያው ስታመራ ነው ያገኘሁህ እስቲ ልብህ ምን ይላል?

የኔሰው፦-  ይህንን ከባድ ወሳኔ ስወስን ዝም ብዬ አይደለም። አርቄ ያየሁት ነገር ስላለ ነው።ከሁሉም በላይ ለነጻነት እና ለፍትህ ለሚደረገው ህዝባዊ አመጽ እንደ ቀንዲል በመሆኔ በውነት እልሃለሁ ልቤ ሃሴት ተሞልቱዋል።

ጠያቂው፤- እንግዲህ የኔ ሰው በኛ ሃገር የፖለቲካ ታሪክ ውስጥ አሁን አንተ ልታደርገው በተዘጋጀህበት ራስን በማቃጠል የተደረገ መስዋእትነት የለም። ለምን ይህን መንገድ መረጥክ?

የኔሰው፤- በሃገራችን ታሪክ ወስጥ ፍትህና ዴሞክራሲን ለማስፈን ሲሉ ብዙ መስዋእትምነት የከፈሉ እየከፈሉም ያሉ እንዳሉ አይዘነጋም። ብዙ ወጣቶች ህይወታቸውን አካላቸውን አጥተዋል። እነሱን ሁልጊዜም አደንቃለሁ። የእኔን እንዳልከው ለየት የሚያደርገው ባለተለመደ ሁኔታ አካሌን አቃጥዬ ለማለፍ መወሰኔ ነው። ለዚህ ከባድ መስዋእትነት ያነሳሱኝን መክንያቶች ልግለጽልህ።

1ኛ አካሌ ሲነድ ተምሳሊትነት አለው።

ዛሬ በፍትህ እና በዴሞክራሲ እጦት የሚቃጠለውን በኑሮ ውድነት እና በድህነት የሚነደውን የህዝብ ኑሮ ለመላው አለም ለማሳየት ሲሆን እኔ ራሴን ሳቃጥል በቁሙ የሚቃጠለውን ህዝብ በተምሳሊትነት ለማሳየት ነው። ይህን ሳደርግ ምን ያህል ግፍና መከራ እንደበዛብን አለም የበለጠ ይረዳል።

2ኛ ለመቀስቀስ

በቱኒዚያ ውስጥ አንድ የዩኒቨርሲቲ ምሩቅ ስራ አጥነትን ና ፍትህ እጦትን ተቃውሞ ራሱን በማቃጠሉ ታላቅ ህዝባዊ ቁጣ ተቀስቅሶ እንደምታየው በለውጥ ጎዳና ላይ ናቸው። ካገሩ አልፎም የአረብ አገሮችን እና ሰሜን አፍሪካን ሁሉ ሊያንቀሳቅስ የቻለ መስዋእትነት ሆኖ አግኝቼዋለሁ። ያ ወጣት የጫረው የነጻነት እሳት እስካሁን ይነዳል። በመሆኑም እኔ  ይህንን መስዋእትነት ስመርጥ ከሁዋላየ የሚነሳውን ታላቅ ህዝባዊ አመጽ እና ፍሬውን እያየሁ ነው።

3ኛ ጥሪዬ ክብደት ይኖረዋል ብዬ ነው

ራሴን ለመስዋእትነት ሳዘጋጅ በአንድ ጥይት ባደርገው ስቃዩ ይቀንስልኝ ነበር። ታንቄ ወይም መርዝ ጠጥቼ ብሞት ይቀለኝ ነበር ነገር ግን እነዚህ የሞት መንገዶች ሁሉ የፈለኩትን ያህል የነጻነት እና የፍትህ ጩኽቴን ሊያስተጋቡልኝ አይችሉም። በመሆኑም ይህንን የከፋውን መራራ ጽዋ ጠጥቼ ማለፍን መረጥኩ። ስቃጠል ፍትህ…ፍትህ…ፍትህ…ፍትህ….እያልኩ ነው። ይህ መስዋእትነቴም ይህንን ጥሪ እንደ ነጋሪት ያስተጋባልኛል ህዝቡንም ሆ ብሎ እንዲነሳ ሃይል ይሆነዋል በሚል ነው።

4ኛ እኛም እንደነ ቱኒዚያና ሌሎች ሃገሮች ጀግና እንዳላን ለአለም ለማሳየትም ነው።

ጠያቂው፤- እንዳልከው በቱኒዚያ ያ ወጣት መስዋእት ከሆነ በሁዋላ ህዝቡ ሆ ብሎ ወጥቶ ለውጥ ማምጣት ችልዋል ካንተ መስዋእትነት በሁዋላ የምትፈልገው ህዝባዊ አመጽ የመነሳቱን ነገር በተመለከተ የእምነትህ ደረጃ የት ይደርሳል?

የኔሰው፡- የእምነት ደረጃዬ እና መተማመኔ ከፍተኛ በመሆኑ ነው ይህን ከባድ መንገድ እንድመርጥ ያደረገኝ። ከኔ መስዋእትነት በሁዋላ ወጣቶች አዛውንቶች ሴቶች ወንዶች ሁሉ ፍትህ..ፍትህ..ፍትህ…እያሉ ሲጮሁ በህሊናዬ ይታየኛል። ይህ ብቻም ሳይሆን የቱኒዚያው ወጣት ከሃገሩ አልፎ ለሌሎች አብሪ እንደሆነ ሁሉ የእኔ መስዋእትነት በፍትህ እጦት በአለም የመጨረሻ ደረጃ ላይ ለሚገኘው የምስራቅ አፍሪካ ህዝብ ንቅናቄ ቀንዲል ይሆናል ብዬ ህሉ አምኛለሁ።

ጠያቂው፦እንግዲህ አንተ መስዋእት ስትሆን ሁለት አይነት ዜናዎች መሰማታቸው አይቀርም። በተለይ በኢትዮጵያ መንግስት ዘንድ ምን ሊነገር የሚችል ይመስልሃል?

የኔ ሰው አንገቱን ወደቀኝ ወረወረና ፈገግ አለ……… ወዲያውም

የኔስወ፦  ምን ይሄ እኮ የታወቀ ነው። መቼ የነሱ አሳብ ይሳታል። አብዶ ነው የሚሉት።

እንደገና የኔሰው ፈገገ አለ…….

ጠያቂው፦ በመጨረሻ የምታስተላልፈው ነገር ካለ እድሉን ልስጥህማ

የኔሰው፡- እኔ እንግዲህ በቃ! የሚለውን መፎክር ከቃል ወደ ተግባር ለመቀየር ራሴን ቀዳሚ አድጊያለሁ። በዚህም ኩራት ይሰማኛል። ለሌሎች ወገኖቼ የምለው በቃ ብለው በአንድነት እንዲነሱ ነው። እኔ ይህንን መስዋእትነት ስመርጥ መኖር ስላልፈለኩ አይደለም። ገና ወጣት ነኝ ይሁን እንጂ ፍርሃትን ለማስወገድ ከባዱን መስዋእትነት እኔ ወስጄላችሑዋለሁና ሆ በሉ ወጡ በአንደነት ነው የምለው። የቱኒዚያን፤ የግብጽን፤ የሶርያን ህዝብ ተመልከቱ

ህዝብ ከተነሳ የሚመልሰው ነገር እንደሌለ ከነሱ ተማሩ እላለሁ። በተረፈ እንደማታሳፍሩኝ ተማምኜባችሁ እስከወዲያኛው ሄጃለሁ ።ቻው።

ጠያቂው፦ በመጨረሻም ስለቤተሰቦችህ የምትለን አለ?

የኔሰው በምናብ እንደገና ነጎደ……….አንገቱን ደፋና ጥቂት አሰበ። አይኖቹ የእንባ ዛላ አዘሉ…..

የነሰው፦- እነሱን እንግዲህ ለኢትዮጵያዊያን ትቼአቸው እሄዳለሁ።

ተቃቀፍን…… ሌሎች ቃለመጠይቁን ሳደርግ የነበሩ ሁሉ አቅፈውት አለቀሱ። በቁጭትም ከንፈራቸውን እየነከሱ የትግሉን ችቦ እንድሚያነሱ ቃል ገቡለት።

ጠያቂው፦ ራእይህ ግቡን እንደሚመታ እኔም አምናለሁ። አምላክ በገነት ያኑርህ ወንድምየ።

የኔሰው፦ አሜን። ቻው።

ወዲያውም የኔሰው ፍትህ….ፍትህ….የፍትህ ያለህ….ያለፍትህ ከመኖር ሞት ይሻለል…ፍትህ…ፍትህ……እያለ እየጮኸ ወደ መስዋእቱ ሜዳ አመራ።

ያዘጋጀውን የፍትህ  ጥያቄ ቀንዲል እሳት  በላዩ ላይ አነደደው። ለብዙ ደቂቃዎች ፍትህን…. እየጠራ የኔሰው የዚህኛውን አለም እስከወዲያኛው ተሰናበተው።

እኔም ጠያቂው  በምናብ የኔሰውን አግኝቼው ያደረኩትን ቃለምልልስ በዚሁ ቁዋጨሁ።

        ገለታው ዘለቀ

  geletawzeleke@gmail.com

Continue reading …

 

የሕገ-መንግሥት ጥሰቱና ገደብ የለሽ አምባገነንነቱ

እየጨመረና እየባሰበት ነው!!

ከአንድነት ለዴሞክራሲና ለፍትሕ ፓርቲ (አንድነት) የተሠጠ መግለጫ 

            በመርህ ደረጃ የምናውቀውና በትምህርት ቤት የተማርነው ሰዎች ከታሪክ ይማራሉ በዚህም ስህተቶች እየታረሙ ይሄዳሉ፣ አይደገሙም የሚል ነው፡፡  ነገር ግን የሕይወት እንቆቅልሽና  በተግባር ስናየው ታሪክ፣ የሚያስተምረን፣ ሰዎች ከታሪክ የማይማሩ መሆናቸውን  መሆኑ  የሚያስገርም  ነው፡፡ ይበልጥ አስገራሚው ደግሞ  ሰዎች እንኳን ከአለፈ  ከታሪክና በፊት ለፊት  ከሚያዩት፣ ከሚሰሙትና ከሚያውቁት እውነታም እንደማይማሩ ነው፡፡ በተለይም አምባገነኖች፤ ጥቂቱንና የቅርቡን ለመጥቀስ፤ የግብፁ ሙባረክ ከቱኒዚያው በንዓሊ አልተማሩም፡፡ የሊቢያው ጋዳፊ ከግብጹ ሙባረክ አልተማሩም፡፡ የየመኑ ዓሊ አብደላ ሳሊሕና  የሶሪያው በሸር አልአሳድ ከጋዳፊ የተማሩ አይመስሉም፡፡ እንዲህ እንዲህ እያለ አንዱ ከሌላው የማይማር መሆኑ የቀጠለና የማያቋርጥ ክስተት እየሆነ ነው፡፡ በአሁኑ ወቅት ከምንም በላይ ግልጽ ሆኖ የመጣው ጉዳይ ከአለፈ ታሪክ፣ እንዲሁም ከፊት ለፊት ከሚያዩትና ከሚሰሙት አለመማር የአምባገኖች አንዱ ዓይነተኛ ባህሪ መሆኑ ነው፡፡

           ከላይ በመንደርደሪያ የጠቀስናቸው አስተያየቶች ያለ ምክንያት አይደለም፡፡ በአገራችን ሥልጣን ላይ ያለው መንግሥትና የገዢው ፓርቲ እያደር እየታረመ፣ እየተማረ፤ እየሰከነና ልብ እየገዛ ይመጣ ይሆናል  እያልን ስለ አገር፣ ስለ ሕዝብና ስለ ራሱም ብሎ የሕግ የበላይነት እንዲያስከብር ደጋግመን ሳንሰለች ስንጎተጉተው ብንከርምም ሰሚ ጆሮ አልተገኘም፡፡ እንዲያውም ይባስ ብሎ አምባገነኑ መንግሥት ሲፈልግ በየጊዜው በሚያወጣቸው አሳሪና አስፈሪ አዋጆች ከፈለገም ያለምንም አዋጅ በጠራራ ፀሐይ ሕገ-መንግሥቱን በጉልበት እየጣሰ ነው፡፡ ዜጎችን አክብሮ  መከበር ለመንግሥት  ባዕድ ነገር  ሆኗል፡፡  መንግሥት በዜጎች ላይ ለሚያደርሰው ጉዳት ተጠያቂነት የለበትም፡፡ ‹‹ማንኛውም ሰው ሰብዓዊ ክብሩና መልካም ስሙ የመከበር መብት አለው›› የሚለው የሕገ-መንግሥቱ አንቀጽ 24 ተ.ቁ 1 የወረቀት ላይ ጌጥ ሆኖ ነው የቀረው፡፡ በመሆኑም  መንግሥት ያለምንም ጥንቃቄና ማስተዋል ከጳጉሜ 2ዐዐ3 ዓም ጀምሮ የሠላማዊና ሕጋዊ ፖለቲካ አራማጆችንና ነፃ ጋዜጠኞችን በሽብርተኝነት ከሶ ወደ ወህኒ ቤት አውርዷቸዋል፡፡ ታሳሪዎቹ በቁጥጥር ሥር ከዋሉ በኋላ በአንድ በኩል በታክስ ከፋዩ ሕዝብ ገንዘብ የሚንቀሳቀሱት  ቴሌቪዥኖች ሬዲዮኖችና ጋዜጦች በሕገ-መንግሥቱ አንቀጽ 2ዐ ተ.ቁ 3 የተከሰሱ ሰዎች ‹‹በፍርድ ሄደት ባሉበት ጊዜ በተከሰሱበት ወንጀል እንደ ጥፋተኛ ያለመቆጠር . . . መብት አላቸው›› የሚለውን በመጣስ አሸባሪነታቸው የተረጋገጠ እንደሆነ በአደባባይ ሲገልጽ ከርሟል፡፡ አሁንም እየገለጽ ነው፡፡

             ከሁሉም በላይ የሚያሳዝነው ደግሞ ሕገ-መንግሥቱን የማሰከበርና የማስጠበቅ ኃላፊነትን በቃለ-መሀላ የተቀበሉት ጠቅላይ ሚኒስትር መለስ ዜናዊ ጥቅምት 9 ቀን 2ዐዐ4 ዓም ፓርላማ  ተገኝተው በአደረጉት ንግግር በሽብር ተጠርጥረው ከተያዙት ተከሳሻች መካከል አንድም ሰው ማስረጃ ያልቀረበበት የለም ብለዋል፡፡ አልፈው ተርፈውም ሁሉም ተከሳሾች በበቂና በአሳማኝ ሁኔታ ወንጅለኛ ሆነው ስለተገኙ ነው በቁጥጥር ሥር የዋሉት በማለት  በሕግ   በሚያሰጠይቃቸው መልኩና በተለመደው ማንአለብኝነት  የሕገ መንግሥቱን አንቀጽ   ጥሰውታል፡፡ የሚገርመው ጉዳዩ ግን እንዲህ ዓይነቱ ማረጋገጫ ከተሰጠባቸውና  አለአግባብ ከተንገላቱት ሰዎች  መካከል አራት ሰዎች በቅርቡ  መፈታታቸው  ነው፡፡ የተነገረውና እውነታው ሰማይና ምድር ያህል የተለያየ መሆኑ ግልጽ ነው፡፡ የሌሎቹም ተከሳሾች ጉዳይ ከዚህ የተለዬ አይደለም  የሚል እምነት አለ፡፡  ተከሳሾቹን እኛ የምናውቃቸውና የምንመሰክርላቸው በሠላማዊ ትግል ተምሳሌትነታቸው ነው፡፡  ዛሬም ድምፃችንን  ከፍ አድርገን እንዲፈቱ እንጠይቃለን፡፡

            ህዳር 9 ቀን 2ዐዐ4 ዓም በፌዴራል ማረሚያ ቤቶች (ቃሊቲ) የተፈፀመው የአምባገነኖች የሕገ-መንግሥት ጥሰት  ደግሞ አንድ ሌላ   ተጨማሪ ማስረጃ ነው፡፡ በእለቱ የማረሚያ ቤቱን ሕግ መሠረት በማድረግ የአንድነት ለዴሞክራሲና ለፍትሕ ፓርቲ (አንድነት) ሊቀመንበርና ሁለት ም/ሊቀመናብርት፣ የፓርቲው የሥራ አስፈፃሚና የብሔራዊ ም/ቤት አባላት  በቃሊቲ በመገኘት በሽብርተኝነት ተጠርጥረው የታሰሩትን የፓርቲውን አባላት፣ የመድረክ አባል ፓርቲ አባላትና ጋዜጠኞችን ለመጠየቅ 6፡ዐዐ ሰዓት ላይ በቃሊቲ በመገኘት   ከሕዝብ ጋር ተራ ይዘው  ወደ  ግቢው  ቢገቡም በእስር ቤቱ ኃላፊዎች  የተለመደ የማንአለብኝነትና የአምባገነንነት መንፈስ የሕገ-መንግሥቱን አንቀጽ 21 በጥበቃ ሥር ያሉና በፍርድ የታሰሩ ሰዎች መብት በሚለው ስር ተ.ቁ 2 ‹‹ ከትዳር ጓደኞቻቸው፣ ከቅርብ ዘመዶቻቸው ከጓደኞቻቸው (ስርዝ የተጨመረ) . . . ጋር ለመገናኘትና እንዲጎበኛቸውም እድል የማግኘት መብት አላቸው›› የሚለው ተጥሶ ጥየቃውን ተከልክለዋል፡፡   ይህ ዓይነቱ ጥሰት ተገቢ  አይደለም በማለት ከኃላፊዎቹ ጋር የተሞከረው ውይይት ሊሳካ አልቻለም፡፡ ምናልባትም  የዓይናችሁ  ቀለም ስለአላማረን ነው  የማትገቡት የሚለው አባባል እዚህም ሊጠቀስ ይችል ይሆናል፡፡ እንደዚህ ዓይነቱ የሕገ-መንግሥት ጥሰት አዲስ አይደለም፡፡  ከዚህ የባሱ የሕገ-መንግሥት ጥሰቶች በከፋና በሚጎዳ ሁኔታ እየተፈፀሙ ነው፡፡  መንግሥት በሕዝብ ስም  በአደራ የያዘውን ሥልጣን ለሕዝብ ማጥቂያ እየተጠቀመበት ነው፡፡ በሕግ ሽፋን ሕዝብን የማጥቃት ዘመቻ እያካሄደ ነው፡፡

            የዚህ መግለጫ ዋና ዓላማ ምንም ቢዘገይ የመንግሥትን ሥልጣን የያዘው ገዢው ፓርቲ ቆም ብሎ በሰከነ አዕምሮ  ስለአገርና ስለ ሕዝብ፤ ስለ ሕገ-መንግሥታዊነት እንዲያስብበት ለማሳሰብ ነው፡፡ እኛ ኢትዮጵያዊን እንደ ሌሎች ሕዝቦች ሁሉ ጉልበተኝነትንና ጥቃትን አምርረን እንጠላለን፡፡  እንታገለዋለንም፡፡ ትግላችንም ጥቃትንና ጉልበተኝነትን ከአገራችን ለአንዴና ለመጨረሻ ጊዜ ለማስወገድ ነው፡፡  ኢህአዴግአዊያን ግን ጉልበተኝነትን፣ አምባገነንነትን፣ ጥቃትን፣ እንቃወማለን ሲሉ ‹‹ብሶት የወለደን ነን ሲሉ›› ጉልበተኝነትን፣ አምባገነንነትን፣ ጥቃትን ከአገር ለማትፋት ሳይሆን እራሳቸውን አዲስ አጥቂዎች፣ አምባገነኖች፣ ጉልበተኞች ለማድረግና ሌሎችን ለመበደልና ለማጥቃት ነው፡፡ አውቀውም ሆነ ሳያውቁ ብሶት የወለዳቸው መሆናቸው ቀርቶ ብሶት የወለደው ሕዝብ እየፈጠሩ ነው፡፡   በእኛ በኩል ኢህአዴግ ከታሪክ ባይማርም ከራሱ ታሪክ በመነሳት ብሶት የወለደው ሕዝብ አምባገነኖችን እንደሚያስወግድ እንገነዘባለን፡፡

          ትግላችን ለእኩልነት፣ ለነፃነት ለእድገትና ብልጽግና ነው፡፡ ከሁሉም በላይ ለሕጋዊነትና ለሕገ-መንግሥታዊነት ነው፡፡ የነፃነቶችና መብቶች መከበር ለእድገትና ብልጽግና ቁልፍ ናቸው፡፡ የነፃነት በርን ጥርቅሞ ዘግቶ ሕገ-መንግሥትን እየደፈጠጡ ስለ ልማት መለፈፍ ትርጉም የለውም፡፡ ሂውማን ደቨሎፕሜንት ኢንዲክስ እንደሚያሳየው ከሆነ በ2ዐ11 ኢትዮጵያ ከ185 አገሮች መካከል በእድገት 174ኛ ደረጃ ላይ ነች፡፡ በዓለም ላይ በእድገት የምትበልጠው 11 አገሮችን ብቻ ነው፡፡› በብልጽግና ደረጃም ቢሆን ኢትዮጵያ ለግምገማ ከቀረቡ 11ዐ አገሮች መካከል 1ዐ4ኛ ነች፡፡ ከዓለም በብልጽግና የምትበልጣቸው 6 አገሮች ብቻ ናቸው፡፡ በዴሞክራሲ ደረጃም የለየላት በአምባገነን ሥርዓት ሥር ያለች አገር መሆኗን ጥናቱ ያሳያል፡፡ ወደድንም ጠላንም እውነታው ይህው ነው፡፡ አውቀን እንታረም፡፡ ይህ በተሳሳተ የታሪክ ጎዳና መጓዝ  ለአገርም፣ ለሕዝብም ለኢህአዴግም ከባድ ዋጋ የሚያስከፍል እንዳይሆን እንጠንቀቅ እያልን ባንደማመጥ ደግመን ደጋግመን እንናገራለን፡፡

 

አንድነት ለዴሞክራሲና ለፍትሕ ፓርቲ (አንድነት)

ህዳር 14 ቀን 2ዐዐ3 ዓም

አዲስ አበባ

Continue reading …

ከሁሉም በፊት በወያኔው ኢሰብኣዊ አገዛዝ ተንገሽግሾ ሰውነቱ ላይ ቤንዚን በማርከፍከፍ ይህችን የደም ምድር ኢትዮጵያ በገዛ ፈቃዱ የተሰናበተውን ወንድማችንና ልጃችንን መምህር የኔሰው ገብሬን የከፈለውን መስዋዕት ፈጣሪ እንደአቤል መስዋዕት ቆጥሮ መንግሥተ ሰማይን ያውርስልን ማለት እፈልጋለሁ፡፡ ካህናት እንዳይታዘቡኝ አንድ ሁለት ቃላትን ልናገር፡፡

[caption id="attachment_10769" align="alignleft" width="320" caption="የኔሰው ገብሬ"][/caption]

     ‹የኔሰው ራሱን አጠፋ› ብዬ ለማመን ይከብደኛል፤ አልችልምም፡፡ እርግጥ ነው ራሱን አጥፍቷል፡፡ ግን ለምን? ይህ ወጣት አስተሳሰቡን እንደብዙ ወጣቶች ለሆዱና ለጠባብ ሥጋዊ ፍላጎቶቹ ለውጦ ኢትዮጵያን ቢክድ በአፍታ ሚሊዮነር ሊሆን በቻለ ነበር – ልማታዊ ነጋዴ፣ ልማታዊ ኢንቬስተር፣ ልማታዊ የሥራ ሂደት ባለቤት፣ ልማታዊ የኢሕአዴግ የወጣት ሊግ፣ ልማታዊ የአነስተኛና ጥቃቅን ኢንዱስትሪ ባለቤት… ቢሆን ኖሮ ቢጠሩት የማይሰማ ዲታ በሆነ ነበር – እንኳን ቀረበት፡፡ የተሻለውን መረጠ፡፡ ከዚህ ሁሉ ግን የኅሊናው ታዛዥ ሆነና በደልንና ኢፍትሓዊነትን በሰላማዊ መንገድ ለመዋጋት ቆርጦ ተነሳ፤ ባዶ ዕጁን በፍቅር ሰባኪ አንደበቱ ብቻ ተዋጋቸው፡፡ ብዙ ጮኸ፡፡ ፍትህና ነጻነት እንዲኖር ታገለ፡፡ ለዜጎች መብት ተከራከረ፡፡ ነገር ግን የጠበቀው ሳይሆን ያልጠበቀው እየተከናወነ ከሥራም ከነጻነትም ከዲሞክራሲያዊ መብትም ሳይሆን ሰሚ አጥቶ ሜዳ ላይ ቀረ፡፡ እናም ለሀገሩና ለወገኖቹ አንድ አቅሙ የሚችለውን ነገር ማድረግ እንደሚኖርበት አመነ፡፡ በዚያም እምነቱ  ለዴሞክራሲያዊት ኢትዮጵያ ምሥረታ አንዲት ጡብ – ከፕሮፌሰር አሥራት፣ ከአሰፋ ማሩ፣ ከፋንታሁን ወርቁና ከሌሎች ጥቂቶች በስተቀር እስካሁን ማንም በፈቃዳቸው ሊሰጧት ያልሞከሯትን አንዲት ጡብ በፅኑ መሠረት ላይ አኑሮ፣ የጀመረው የመብት ተሟጋችነትና የነጻነት ትግል ግን እንዳይቋረጥ ተማፅኖ ላይመለስ አልፏል፤ በኔ በኩል እንደኃጢያት እንዳይያዝበት ይልቁንም በየማነ አብ እንደተቀመጠው በክርስቶስ ደም የጸደቀ ፈያታይ አሁኑኑ በእግዚአብሔር ቀኝ እንዲቀመጥ እጸልያለሁ፡፡ እናም ይህ ወጣት አርአያ ሊሆነን ተነሳስቶ በወሰደው እርምጃ ራስን የማጥፋት ወንጀል እንደፈፀመ ቆጥሬ ልቃወመው የሚያስችለኝ የሞራል ድፍረት የለኝም፡፡ ስንፈራው የነበረው ነገር ድኾ ድኾ መምጣቱን ግን ልብ ይሏል፡፡ እንደቺንዋ አቼቤ የመጽሐፍ ርዕስ ”No Longer at Ease” ማለት ከአሁን ወዲህ ነው፡፡ ወያኔ ከእንግዲህ ባጭር ሊታጠቅ ይገባዋል፡፡ የዘራውን ለማጨድ፣ በሠፈረው ቁና ለመሠፈር ዐውድማውን ይለቅልቅ እንጂ የሀገር ሀብትና ንብረት ለፖለቲካ ሎቢስቶች(አሻሻጭ ደላሎች) እና ቢቢሲን ለመሳሰሉ ቅሌታም የዜና ማዕከላት በገፍ እየረጨ የበሬ ወለደ ነጭ ውሸቱን ቢነዛ ከአሁን በኋላ ፋይዳ የለውም፡፡ በሞተ ሰዓት ኢትዮጵያ  በብርሃን ፍጥነት እያደጉ ከሚገኙ አራት የዓለም ሀገሮች ውስጥ  አንዷ ሆናለች ብሎ መናገርና ማስነገር ቀርቶ ወያኔ ዛሬም ይሁን ነገ ሥነ ሕይወታዊ ቀመሩን በድንገት ለውጦ ከእባብነት ወደርግብነት ተቀይሮ ለመላው የኢትዮጵያ ሕዝብ ማርና ወተት ከሰማይ ቢያዘንብ የሚያምነውም ሆነ የሚቀበለው የለም፡፡ የወያኔን ነጭ ውሸት ለለመድነው የዛሬው ውሸት ምንም ላይመስለን ይችላል፡፡  ነገር ግን ዓለም አቀፍ ተቀባይነት ያላቸውን እንደቢቢሲ ያሉ የዜና ተቋማትን ተንተርሶ እንዲህ እንደዛሬው ያለ ወራዳ ዜና ሲነገር በውነቱ ያሳዝናል፤ ሰው ሆኖ መፈጠርንም ያስጠላል፡፡ ሕግ የለም እንጂ ቢኖር ኖሮ ቢቢሲን ዘ ሄግ ፍርድ ቤት ወስዶ መገተር ነበር – ለነገሩ እሱስ የማን መሣሪያ ሆነና፡፡ የመጥረቢያ ልጅ መዘለፊያ አይደል ተረቱስ? አንደኛው አንባቢ አንደኛው ተርጓሚ!

እውነቱን ለመናገር ከማስታውሰው የቅርብ ጊዜ የፕሮፓጋንዳ ታሪክ እንደዛሬ ያዘንኩበት ጊዜ የለም፡፡ ቢቢሲን ያህል እንደመርግ የሚከብድ ታላቅ የዜና አውታር እንዲህ የመሰለ ውርደት ውስጥ ይገባል ብዬ በህልሜም ሆነ በዉኔ አስቤው አላውቅም፡፡ እርግጥ ነው በነጭና በጥቁር፣ ባደጉና ባላደጉ ሀገሮች መካከል አድልዖ እንደሚያደርግ ብዙ ጊዜ ታዝቤያለሁ፡፡ የምዕራባውያን ጥቅምና ፍላጎት ሲነካ ቀኑን ሙሉ ብቻ ሳይሆን ሣምንቱንና ወሩን በሞላ በዚያ ዜና ላይ ሲያላዝኑበት ይከርማሉ፡፡ በኢትዮጵያ የሚያልቅ የመቶ ሺህ ሰው ሕይወት በስዊድን በመኪና አደጋ ከሚሞት የአንድ አሟሟቱ ካልሆነ ሞቱ በፈጣሪ ዘንድ ብዙም ሀዘኔታን የማያስከትል ውሻ ሕይወት ይበልጥባቸዋል፡፡ ግነት አይደለም፡፡ ምንም እንኳን እንደዘይና በዳዊ ያሉ ታዋቂ ጥቁር ጋዜጠኞች በእስታፍነት አብረው ቢኖሩም – ቢቢሲዎች ጥቁር ሰው፣ ሰው መስሎ የሚታያቸው አይመስሉኝም ባጠቃላይ፡፡ በኢትዮጵያ የ97 ምርጫ ለምሳሌ ያ ሁሉ ሕዝብ ሲረግፍና የ85 ሚሊዮን ሕዝብ የዲሞክራሲ ሽል ሲጨነግፍ ከሴከንዶች ያለፈ ሽፋን አልጡትም፡፡ በወቅቱ አዝኛለሁ፤ ከአሁኑ ባይብስም፡፡ ሰዎቹ በሽተኞች ናቸው፡፡ በዘረኝነትም ይለከፉ በጥቅምና ፍላጎት ዋናው ባለጌና ደደቦች ናቸው – ልክ የሌለው ደደብነት፡፡ እነዚህ ሰዎች ሠልጥነናል የሚሉ ከሆነ፣ ሃይማኖት አለን የሚሉም ከሆነ በጣሙን ተሳስተዋል፡፡ የሠለጠነና ሃይማት ያለው ሰው፣ ሰው በጠቆረና በቀላ ወይም በኢኮኖሚ ባደገና ባላደገ ብሎ የዜና ሽፋን ቅድሚያና ትኩረት አይሰጥም፡፡ ስለዚህ መንገዱ ያላችሁ ንገሩዋቸው – ፈጣሪንም ኅሊናቸውንም እያሳዘኑ ነው፡፡ የኛስ ግዴለም፡፡ ነጻ በወጣን ጊዜ ነጻ እንወጣለን፡፡ ያኔም የነሱን እውነተኛ ማንነት እንነግራቸዋለን፤ የሚሰሙበት ጆሮ ካላቸው፡፡

የውሸቱ ንጉሥ ኢቲቪ ቢቢሲን ጠቅሶ ከደቂቃዎች በፊት እንደዘገበው፣‹ኢትዮጵያ፣ ፈጣን ዕድገት እያስመዘገቡ ከሚገኙ አራት የዓለም ሀገራት አንደኛዋ ናት፡፡ ይህ ዓይነት ዕድገት የዛሬ ሃያ ዓመት ቻይና ያስመዘገበችው ዓይነት ዕድገት ነው፡፡ በአሁኑ ወቅት በምታሳየው ፈጣን ዕድገት ሥራ አጥነት እየጠፋ፣ ሕዝብ ከርሀብና ችግር እየተላቀቀ፣ሀገሪቱ በከፍተኛ ደረጃ በዕድገት እየተመነደገች፣ የትራንስፎርሜሽኑ ዕቅድ በታሰበው መንገድ እየገሠገሠ … ሊገኝ የቻለው መንግሥት ባመቻቸው የኢንቬስትመንት ዕድል› ነው፡፡  በአግራሞትና በድንጋጤ ተውጬ ነው በትግስት የተከታተልኩት፡፡ ሰው ውሸታም መሆን ከፈለገና ኀሊናውን ለጥቅም ከሸጠ ለካንስ የማይዋሽ የውሸት ዓይነት የለም? እንዲህ ተዋሽቶ የሚበላ እንጀራ ገደል ይግባ፡፡ የፈረንጅ ሙሰኛ ደግሞ በጣም ያስቀይማል፡፡ የታዳጊ ሀገር ጋዜጠኛ ቢሆን እናዝንለት ይሆናል – ደመወዙ ስለማይበቃው ሊሆን ይችላል ብለን፡፡ ቢቢሲ ግን መቼም በሀገሪቱ የኑሮ ደረጃ የሚበቃቸውን ያህል ሳይከፍሏቸው አይቀሩም – ሰዎች ስንባል በደምሳሳው እምብርት ባይኖረንም፡፡ ታዲያ ወደዚህ ቅሌት ውስጥ ምን አስገባቸው? የተነገራቸውን በጥሬው ምናልባትም ‹ተሞኝተው› አመኑ ብንልስ ከገለልተኛ ወገን ለማጣራት እንዴት አልሞከሩም? ስንት ቢከፈላቸውስ ይሆን ይህን ያህል አንዲት ድሃና በዴሞክራሲ ዕጦት ምክንያት በስደተኞች ብዛት ከመጀመሪያዎቹ አምስት ሀገራት ውስጥ ያለች ሀገር በዓለም በዕድገት ከአራቱ አንዷ ናት ብለው የመሠከሩት? አሁን እኔ ቢቢሲን ለመክሰስ አቅምም ሆነ ችሎታ የለኝም፤ መቼም የሚኖረኝም አይመስለኝም፡፡ ባለችኝ ብቸኛ የጸሎት መሣሪያ ግን ልታገላቸው መብትም ምክንያትና ፍላጎትም አለኝ፡፡ የአቡነ ዘበሰማያት ቶር ደግሞ ለተናቁ ዋና ፍላጻ ነው – ሲወረወር አይታይኝም ሲወጋ እንጂ – ይላሉ አባቶች፡፡ በቅንነት ለምንለምነው ፈጣሪ ይስማንና እንደፈቃዱ ያድርግልን፡፡ ዱሮውንም ችግራችን እንዴትና ምን እንደምንጠይቀው በውል አለመረዳታችን እንጂ ‹የነገሩትን የማይረሳ የለመኑትን የማይረሳ› አምላከ ኢትዮጵያ አያሳፍረንም ነበር፡፡ አሁን ግን ግዴላችሁም በየቻልነው መንገድ በቡድንም በተናጠልም እንበርታና ይህችን የጨለማ ዘመን ተባብረን እናንጋት፡፡ የኔን አቅም ከተናገርኩ ዘንድ በውጭ ሀገር ያላችሁና ለሀገሬ እቆረቆራለሁ የምትሉ ወገኖች ይህን መርዘኛ የውሸት ዜና ቢያንስ ለታወቁ ዓለም አቀፍ ተቋማት በያላችሁበትና በተቻላችሁ መጠን አጋልጡ፡፡ ‹ተደጋግሞ የተነገ ውሸት እንደእውነት ይቆጠራል› ‹አንድ ወሬኛ ያባረረውን ሺህ ፈረሰኛ ጦር አይመልሰውም› መባሉ የወሬን አደገኛነት ለማስገንዘብ ነው፡፡ ለጊዜው በወያኔ ተገዝግዛ በጣር በምትገኘው በእምዬ ኢትዮጵያ ፃዕረ-ሞት ይዣችኋለሁ፡፡ እንዴ? ልጆች የሏትም እንዳታስበሏት አደራችሁን፡፡ ውሸት ገደብ ሊኖረው ይገባል፡፡ ለውሸታቸው ለከት እንዲያበጁለት ንገሯቸው፡፡

እንዲህ በሉልኝ፡- የሰብኣዊ መብት ተሟጋቹ የኔሰው ገብሬ ብሶቱን ለዓለም ሕዝብ ለማሰማት የገዛ ሕይወቱን ቤንዚን አርከፍክፎ በማቃጠል የተሰዋው፣ ጋዜጠኛ እስክንድንር ነጋና ሌሎች በብዙ ሺዎች የሚቆጠሩ ጋዜጠኞች፣ የተቃውሞ ፖለቲካ ፓርቲ አመራሮችና አባላት፣ ተጠርጣሪ የፖለቲካና የኅሊና እሥረኞች በየዘብጥያው የታጎሩትና እየተሰቃዩ ያሉት ይሄን ዕድገት ተቃውመው ይሆን? በሉልኝ፡፡ እነዚያ የቢቢሲ ልማታዊ ‹ጋዜጠኞች› በኢሚግሬሽን ቢሮ አላለፉ ይሆን? በሺዎች የሚቆጠሩ ኢትዮጵያውያን ኢምግሬሽንን ያጥለቀለቁት ለቱሪስትነት ወደዱባይና ወደአካፑልኮ ቤይ ወደ ሆኖሉሉ ሊሄዱ ይሆን? በእግራቸውና በታንኳ፣ በበረሃና በባሕር ከመሞት መሰንበት ብለው ላያልፍላቸውና የዱር አውሬና የባሕር እንስሳት ቀለብ የሚሆኑት በየቀኑ ከኢትዮጵያ የሚሰደዱት ወገኖቻችን ይህን ‹ፈጣን ዕድገት› ጠልተው ይሆን? በሕዝብ የሚቀልድ ዋጋ ይከፍላል በሉልኝ፡፡ በእርግጠኝነትም ይከፍላሉ፡፡ ‹ቀበጥ አማት ሲሦ ብትር አላት› የሚለውን ብሂላችንን አስረዱልኝ፡፡

እነዚያን ሌቦች የቢቢሲ ጋዜጠኞች እንዲህም በሏቸው፡- ሕንጻ የዕድገት መለኪያ አይደለም፤ ሕንጻ አይበላም፡፡ መንገድም አይበላም – በዕድገት ፍጥነት ከአራቶች ውስጥ የሚያስገባ በቂ መንገድም የለንም፡፡ ፋብሪካ የዕድገት መለኪያ አይደለም፡፡ አንድ ፋብሪካ ባለቤቱ ቢያንስ አንድ ነው፡፡ ቀጥሮ የሚያሠራቸው ግን ብዙ ድሆች ናቸው፡፡ ያ ቀጣሪ በአብዛኛው ሌባ ነው፡፡ የገዛ ሆዱን እየሞላና በየሣምንቱ አውሮፓና አሜሪካ እየተንሸራሸረ ሠራተኞቹ ግን የራስ ምታት አስፕሪን መግዣ እንኳን እያጡ ጭንቅላታቸውን በእራፊ ጨርቅ ጠምጥመው ነው የርሱን የማይሞላ ከርስ ለመሙላት በላብ እየተጠመቁ በሥራ ሲፈጉ የሚውሉት፡፡ እነዚህ ዘመናዊ ባሪያ ፈንጋዮች የሚሰጡት የእማኝነት ቃል ደግሞ ባብዛኛው ‹የዐይጥ ምሥክር ድንቢጥ› እንዲሉ ዓይነት ነው፡፡  ‹ቦሃ ላይ ቆረቆር፡፡› የዘንድሮው ኢትዮጵያዊ ላይ ሀብታም ኢንቬስተርነት ተደምሮ፡፡ የቀን ጉዳይ ነው እንጂ ሁሉንም እናውቀዋለን፡፡ ወያኔን ማን ቀጥ አድርጎ እንደያዘው ይታወቃል፡፡ ገንዘብ ብቻውን የማያድንበት ጊዜ ደግሞ እየመጣ ነው፡፡ ግን ግን ሁሉም ዋጋውን ያገኛል፡፡ ዛቻ እንዳይመስላችሁ፡፡ ቀኑ ቀርቧል፡፡ እንዲህ የምንጮህ ወገኖች ደግሞ እንደዮሐንስ መጥምቁ የጽድቅ የክብር አክሊል ለማግኘት አልመን ወይ ተመኝተን አይደለም፤ በጭራሽ!  ጨለምተኞች ሆነን የማስበርገግ ዓላማ ኖሮንም አይደለም – አንዳንዶቻችን እንዲያውም ራሳችን በርጋጎች ነን – በየስርጓጉጡ ተደብቀን እንደዕንቁራት የምንጮህ፡፡ እንደምንም እንጩህ ጩኸታችን ግን ትክክለኛ ጩኸት ነው፡፡ ደግሞም ይህን ዕወቁልን – የምንጮኸው  የሚታየን ነገር በሉ በሉ እያለ ዕረፍት ስለሚያሳጣን ነው፡፡ አንዳንዶች በሟርተኝነት እስኪፈርጁን ድረስ  እንዲህ ተጨንቀን የምናስጨንቃችሁ ለ‹በጎ› እንደሆነ ቁጠሩልን፡፡  አለዚያማ ነገር ዓለሙን ትቶ መተኛትን ማን ይጠላል? … እናም አትዘኑብን፡፡

 ‹ኢ(ይ)ድኅን ንጉሥ በብዝኃ ሠራዊቱ›፡፡ ንጉሥ በሠራዊቱ ብዛት አይድንም፡፡ ቀድሞ የተነገረ ወንጌላዊ ቃለ ግሣጼ ነው፡፡ በሠራዊት ብዛትና በሀብት ክምችት መዳን ቢቻል ኖሮ ሌሎቹ ሁሉ ቀርተው ‹የዓለምን የገንዘብ ልውውጥ በወርቅ ሣንቲም አድርጌ አውሮፓንና አሜሪካንን በእንትናቸው ቁጭ አደርጋቸዋለሁ!› ብሎ ከመዛቱ በጥቂት ጊዜ ውስጥ ዋጋውን ያገኘው ሙኣማር ጋዳፊ እስከወዲያኛው በሊቢያ ሕዝብ ጫንቃ ላይ እንደሸና በኖረ ነበር – እውነቴን ነው ፤ ከሌሎች ቃላት ይህኛው ይቀላል ከሚል ነው እንጂ የርሱ ነገር ከዚያም በላይ ነው፡፡ ጠንቁ ለኛም ደርሶ እንዲያውም ሲያስመልሰው ይደርና ዕድሜ ለመለስ የኛ ወገኖችም በፈላ ውኃ እስከመቀቀል የደረሱበት ዘግናኝ አገዛዝ መሥርቶ ነበር፡፡ ግን ምን ዋጋ አለው የክፉ መጨረሻ ያው ክፉና ክፉ ብቻ ነውና ብድር በምድሩን በውርደት አገኛት – ሲያንሰው ነው፡፡ ብዙዎቻችን ማገናዘብ እየተሳነን እንጂ የዚህች ዓለም እውነት አትለወጥም፡፡ በሠይፍ የገደለ በሠይፍ ይገደላል፡፡ ያሰቃዬ ይሰቃያል፡፡ የገፈፈና የቀማ ይገፈፋል ይቀማልም፡፡ ግና የዱባ ጥጋብ ካለስንቅ እንደሚያዘምት ሁሉ ለጥቂት ዓመታት በምናገኛት ‹ዕድል› ተጠቅመን ጥሩ ታሪክ መተው ስንችል ያችን አለመላው አበለሻሽተን እንዲያውም ዳፋችን ለብዙዎች ይተርፍና አይሆኑ ሆነን እንቀራለን፡፡ የመለስና የመሰሎቹ መጪው ዕድልም ከባሕርይ አባቶቻቸው ከነሣዳምና ከነጋዳፊ የሚዘል አይደለም፡፡ የቀንን ፍርድ የሚያውቅ አደብ ይገዛል፡፡

ለነዚያ የቢቢሲ ጋዜጠኞች ግን አደራ ይህችን ደብዳቤ አድርሱልኝ፡፡ እንርገማቸው፡፡ ዘራቸው ብኑን ይሁን፡፡ ከኔ ደም ተንቅሮ የተሠጣቸውን የመዋሻ ገንዘብ ሳይበሉት ይቅሩ፡፡ የኢትዮጵያ አምላክ ብድራታቸውን አሁኑኑ ይክፈላቸው፡፡ ጥቁር ውሻ ይውለዱ – እንደነወያኔዎቻችን( እነወያኔዎች ወልደዋልና!እመለስበታለሁ)፡፡

የኢሜል ሣጥኔ ለስድብ ቦታ የለውም – ለገምቢ አስተያየት ግን እነሆ አድራሻየ፡ yiheyisaemro@gmail.co

Continue reading …

•  ዶ/ር ብርሃኑ ነጋ፣ አቶ አንዳርጋቸው ፅጌ፣ ጋዜጠኛ ዐብይ ተክለማሪያም፣ ጋዜጠኛ መስፍን ነጋሽ፣ ጋዜጠኛ ፋሲል የኔዓለም በክሱ ውስጥ ይገኙበታል
•  እስረኞች ቶርቸር እንደተፈፀመባቸው ገልጸዋል

የአንድነት ለዴሞክራሲና ለፍትሕ ፓርቲ /አንድነት/ ምክትል ሊቀመንበርና የህዝብ ግንኙነት አላፊ አቶ አንዱዓለም አራጌን ጨምሮ 24 ሰዎች በዛሬው ቀን ክስ ተመስርቶባቸዋል፡፡ በዛሬው ዕለት ከሰዓት በኋላ የተሰየመው የፌድራል ከፍተኛ ፍርድ ቤት 3ኛው ወንጀል ችሎት 8 ተከሳሾች ቀርበው የክስ ቻርጅ የተቀበሉ ሲሆን ከተራ ቁጥር 9-24 ያሉት ተከሳሾች በሌሉበት ክሳቸው ተመስርቶአል፡፡

በቁጥር የፍ/ሚ/ፌ/ማ/መ/ቁ 00180/04 ጥቅምት 30 ቀን 2004 ዓ.ም. በቀረበው የክሰ ቻርጅ ላይ አቶ አንዱዓለም አራጌ ዋለ፣ አቶ ናትናኤል መኮንን ገ/ኪዳን፣ አቶ ዮሃንስ ተረፈ ከበደ፣ አቶ ክንፈ ሚካኤል ደበበ በረደድ፣ አቶ ምትኩ ዳምጠው ውርቁ፣ ጋዜጠኛ እስክንድር ነጋ ፈንታ፣ አቶ አንዱዓለም አያሌው ገላው በአካል ፍርድ ቤት ተገኝተው የክስ ቻርጅን የተቀበሉ ሲሆን የቀሩት በሌሉበት ክሱ ቀርቧል፡፡ በአካል ያልቀረቡ ተከሳሾች በጋዜጣ እንዲጠሩ ዐቃቢ ህግ ለፍርድ ቤቱ አቅርቧል፡፡

በጋዜጣ እንዲጠሩ የተከሰሱት አቶ አንዳርጋቸው ፅጌ፣ ዶ/ር ብርሃኑ ነጋ ቦንገር፣ ውቤ ሮቤ፣ አቶ ኤፍሬም ማዴቦ፣ አቶ መስፍን አማን፣ አቶ ዘለሌ ፀጋ ስላሴ፣ ጋዜጠኛ ፋሲል የኔአለም፣ አቶ አበበ በለው፣ አቶ አበበ ገላው፣ አቶ ንአምን ዘለቀ፣ አቶ ኤልያስ ሞላ፣ አቶ ደሳለኝ አራጌ ዋለ፣ ኮ/ሌ አለበል አማረ፣ አቶ ኦባንግ ሜቶ፣ ጋዜጠኛ መስፍን ነጋሽና ጋዜጠኛ ዐብይ ተ/ማሪያም ናቸው፡፡

በችሎቱ ላይ አቤቱታ ያቀረቡት ሁለተኛ ተከሳሽ የአንድነት ለዴሞክራሲና ለፍትሕ ፓርቲ ብሔራዊ ምክር ቤት አባል መምህር ናትናኤል መኮንን እንዳሉት “በማዕከላዊ እስር ቤት ግፍ ተፈጽሞብኛል፡፡ ከወንጀል ምርመራ ኋላፊ እስከ ታችኛው ወንጀል መርማሪ ሠራተኛ አንድ ላይ ሆነው ልብሴን ሙሉ በሙሉ አስወልቀው ውሃ እየደፉብኝ ለ23 ቀን ሙሉ አሰቃይተውኛል፡፡ እነሱ የሚፈልጉትን እንድናገር ጠይቀውኝ አልናገርም በማለቴ 7 ቀን ምግብ እንዳልበላ፣ እነሱ የሚሉኝን የማልናገር ከሆነ አትቀመጥም አትተኛም ብለው በቁም እንድሰቃይ አድርገውኛል፡፡ እጄን ወደ ኋላ አስረው አሰቃይተውኛል፡፡ የፌድራል ሰባአዊ መብት ኮሚሽን ኮሚሽነር እኔ በስቃይ ላይ ባለሁበት ወቅት ሌሎች ክፍሎች ጎብኝተው እኔን በመዝለል በማዕከላዊ ወንጀል ምርመራ በበርካታ ዜጎች ላይ የሚፈፀመውን ግፍ እንዳልተፈፀም ለመሸፈን በመሞከር ትብብር አድርገዋል፡፡ በጊዜ ቀጠሮ በምቀርብበት ፍርድ ቤት አመልክቼ በዛሬው ዕለት የምርመራ ኋላፊው ቀርበው እንዲያስረዱ ቀጠሮ ተይዞ የነበረ ሲሆን፣ ቀርበው ከማስረዳት ይልቅ በሌላ በኩል እኔን እዚህ ፍርድ ቤት አቅርበውኛል” በማለት ያመለከቱ ሲሆን ፍርድ ቤቱ “ወደ ፊት በክርክሩ ወቅት እንሰማዋለን” በማለት አልፈውታል፡፡

ተከሳሾች ጠበቃ ማቆም የሚችሉና የማይችሉ መሆኑን ጠይቀው አንችልም ላሉት መንግስት እንዲያቆምላቸው አዟል፡፡ ተከሳሾቹ ከጠበቃቸው ጋር ተመካክረው ለህዳር 5 ቀን 2004 ዓ.ም. እንዲቀርብ ቀነ ቀጠሮ በመያዝ የዕለቱ ችሎት ተጠናቋል፡፡

በተያያዘ ዜና በትላንትናው ዕለት የተሰየመው ፌድራል ከፍተኛ ፍርድ ቤት 3ኛው ወንጀል ችሎት “በአሸባሪነት” ክስ የተመሰረተባቸው በእኔ ኤልያስ ክፍሌ ክስ የተከሰሱት የኢትዮጵያ ብሔራዊ አንድነት ፓርቲ ሊቀመንበር ዘሪሁን ገ/እግዚሐብሔር፣ ጋዜጠኛ ውብሸት ታዬ፣ ጋዜጠኛ ርዕዩት ዓለሙ እና ወ/ሮ ሂሩት ክፍሌ የዐቃቢ ህግ ምስክሮች ተሰምቷል፡፡ በዚህ የክስ መዝገብ ከ1-6 የቀረቡት ምስክሮች ሰራተኛ፣ ሊስትሮ የሚሠሩና ዕቃ በማዞር በመሸጥ የሚተዳደሩ መሆናቸውን አድራሻቸውን ሲገልፁ ተደምጠዋል፡፡ አንዱ ምስክር መምህር ሲሆን ሦስቱም ምስክሮች ጋዜጠኛ ውብሸትና ርዕዮት ዓለሙ ከኮንፒተር ጹሑፍ አውጥተው ለፖሊስ ሲሰጡ በታዛቢነት ማየታቸውን፣ ወረቀቶቹን በእንግሊዘኛና በአማርኛ የተፃፉ መሆናቸውን እንጂ ይዘታቸውን እንደማያውቁ ገልፀዋል፡፡

ጠቅላይ ሚንስተር መለስ ዜናዊ በቅርቡ ባደረጉት ንግግር የማያወላዳ ማስራጃ በያንዳንዱ ተከሳሽ ላይ ይቀርባል ተብሎ እንደነበር ይታወሳል፡፡ ይሁን እንጂ እስካሁን ባለው የፍርድ ድራማ ሂደት እንደምንረዳው የፍትሕ ተቋማት ተቃዋሚን የማጥቂያ መሳሪያ ከመሆን ያለፈ ጉዳይ አለመሆኑን ነው፡፡

ሁሉም የኢትዮጵያ ልጆች በፖለቲካ ልዩነት ተቻችለው የሚኖሩበት ሃገርና ተባብረው ችጋርና ድህነትን ለማስወገድ የሚሠሩበት ሃገር ለመፍጠር ትግሉ ተጠናክሮ ሊቀጥል ይገባዋል፡፡ ለዴሞክራሲና ለነፃነት ለሚደረገው ትግል በሞራል፣ በሃሳብና በገንዘብ ይርዱ፡፡ የያንዳንዳችን ጥርት ለትግሩ የራሱ ድርሻ አለው፡፡

ጊዜው የተግባር ነው!

አንድነት ለዴሞክራሲና ለፍትሕ ፓርቲ የሕዝብ

(የአቃቤ ህጉን የክስ ቻርጅ ለማንበብ እዚህ ላይ ይጫኑ)

 

Continue reading …

ሪፖርተር

[caption id="attachment_10582" align="alignleft" width="300" caption="ዶ/ር ነጋሶ ጊዳዳ  ና  አቶ ገብሩ አስራት"][/caption]

ፀረ ሙስና ኮሚሽን ከአዲስ አበባ ዩኒቨርሲቲ ጋር በመተባበር በ1993 ዓ.ም. ባካሄደው ጥናት በአገሪቱ ውስጥ ከሚታዩ ዋና ዋና ችግሮች መካከል ሙስና አንዱ መሆኑ ተጠቅሶ ነበር፡፡

ሙስና የአገሪቱ ችግር ነው የሚለው ይህ የኅብረተሰቡ አስተሳሰብ ከአሥር ዓመት በኋላም የተቀየረ አይመስልም፡፡ በ1993 ዓ.ም. የተቋቋመው የፀረ ሙስና ኮሚሽንም ሙስናን በመዋጋት ረገድ ከፍተኛ እምነት ተጥሎበት የነበረ ቢሆንም፣ በአገሪቱ የሚታየው ሙስና በዓይነትና በመጠን ከጊዜ ወደ ጊዜ እየተስፋፋ መምጣቱን ታዛቢዎች ይገልጻሉ፡፡

እንደ ትራንስፓረንሲ ኢንተርናሽናል የመሳሰሉት ዓለም አቀፍ ተቋማት የሚያወጧቸው ሪፖርቶችም ሙስና በአገሪቱ እየጨመረ መምጣቱን የሚያመላክቱ ናቸው፡፡ አገሪቱን የሚያስተዳድሩት ከፍተኛ የመንግሥት ባለሥልጣናት ጭምር በሙስና ተዘፍቀዋል የሚለው ጉዳይ በኅብረተሰቡ ዘንድ መወያያ አጀንዳ ከሆነ ውሎ አድሯል፡፡ ‹‹ይህ ሕንፃ እገሌ የሚባለው ባለሥልጣን ንብረት ነው፤ ይህ ቪላ እንትና የሚባለው ሚኒስትር ነው፤›› የሚል መረጃ ከአንዳንድ ውስጥ አዋቂዎች መሰማት የተለመደ ነው፡፡ ባለሥልጣናት በሙስና ተዘፍቀዋል የሚለው የሕዝቡ እሮሮ ግን በማወቅም ይሁን ባለማወቅ ከመንግሥት በኩል በቂ ምላሽ ያገኘ አይመስልም፡፡

ኢሕአዴግ በሥልጣን ላይ በቆየባቸው ባለፉት 20 ዓመታት በሙስና ተጠርጥረው የተከሰሱ ከፍተኛ የመንግሥት ባለሥልጣናት በጣት የሚቆጠሩ ናቸው፡፡ ከእነዚህ መካከል የቀድሞ ጠቅላይ ማኒስትር ታምራት ላይኔ በሙስና ወንጀል ተጠርጥረው መታሰራቸው ገዢው ፓርቲ ኢሕአዴግ በሙስና ጉዳይ ላይ ቁርጠኛ አቋም እንዳለው የሚያሳይ ነው በማለት አንዳንድ አስተያየት ሰጪዎች በወቅቱ ገልጸው ነበር፡፡ በጠቅላይ ሚኒስትር ታምራት ላይ መንግሥት ዕርምጃ መውሰዱ በሙስና ወንጀል አንደማይደራደር አመላካች ውሳኔ መሆኑን ያመኑት ጥቂቶች አልነበሩም፡፡ ይህ የኅብረተሰቡ አመለካከት ግን በሂደት እየተሸረሸረ ሳይመጣ አልቀረም፡፡ አንዳንድ አስተያየት ሰጪዎች እንደሚሉት በሙስና ወንጀል የተዘፈቁ አንዳንድ ከፍተኛ የመንግሥት ባለሥልጣናትን ተከታትሎ ለፍርድ የማቅረብ ጉዳይ ትኩረት የተነፈገው ይመስላል፡፡ ባለሥልጣናቱ የፖለቲካ ልዩነት እስካልፈጠሩ ድረስ ያሻቸውን እንዲያደርጉ፣ የፖለቲካ ልዩነት ከፈጠሩ ግን በሙስና ተጠርጥረው የሚታሰሩበት ዕድል ሰፊ መሆኑን የሚናገሩት እነኚሁ ታዛቢዎች፣ ይህንን ሐሳባቸውን ለማጠናከር ከሕወሓት ክፍፍል በኋላ የአቶ ስዬ አብርሃን በሙስና ተጠርጥሮ መታሰር በምሳሌነት ይጠቅሳሉ፡፡

በአገሪቱ እየተስፋፋ የመጣውን የሙስና ወንጀል ለማስቆም መንግሥት ምን እየሠራ ነው? የሚል ጥያቄ በተደጋጋሚ የሚቀርብላቸው ጠቅላይ ሚኒስትር መለስ ዜናዊ ሙስናን መቀነስ የሚቻለው ኅብረተሰቡን በማስተማር እንደሆነ ይናገራሉ፡፡ ሰሞኑን ፓርላማ ተገኝተው በወቅታዊ ጉዳዮች ላይ ማብራርያ በሰጡበት ወቅትም ይህንኑ ደግመውታል፡፡ መንግሥት የሙስና ወንጀል ስለመፈጸሙ በቂ ማስረጃ ካለው ጉዳዩን ወደ ፍርድ ቤት በመውሰድ ወንጀለኞችን ተጠያቂ የማያደርግበት ምክንያት እንደሌለ የገለጹት ጠቅላይ ማኒስትሩ፣ ሙስናን በመቀነስ ረገድ ትልቅ ለውጥ ማምጣት ከተፈለገ ግን ኅብረተሰቡን ማስተማር ግድ እንደሚል ያስረዳሉ፡፡

የዓረና ትግራይ ሊቀመንበር አቶ ገብሩ አስራት ግን ገዢው ፓርቲ ኢሕአዴግ ሙስናን በመዋጋት ረገድ ቁርጠኝነት የጐደለው መሆኑን ይገልጻሉ፡፡

ሙስና በአገሪቱ ውስጥ ስለመስፋፋቱ ራሱ መንግሥትም የሚያምነው ጉዳይ መሆኑን የሚናገሩት አቶ ገብሩ፣ መንግሥት ችግር መኖሩን ቢያምንም በተጠርጣሪዎች ላይ ዕርምጃ የመውሰድ አቅምም ሆነ ፍላጐት የሌለው መሆኑን ያስረዳሉ፡፡

እርሳቸው እንደሚሉት በአሁኑ ጊዜ በአገሪቱ የሚታየው ሙስና በከፍተኛ ባለሥልጣናት ጭምር የሚፈጸም ቢሆንም፣ አልፎ አልፎ ‹‹እገሌን አባርሬያለሁ›› የሚል መግለጫ ከመስጠት በስተቀር በግልጽ ሙስና ስለመፈጸማቸው በሚታወቁ ባለሥልጣናት ላይ ዕርምጃ መውሰድ አልቻለም፡፡

‹‹ባለሥልጣናቱ ከመንግሥት ጋር እስከተስማሙ ድረስ ሙስና ቢፈጽሙም ሃይ የሚላቸው ኃይልም ተቋምም የለም፤›› በማለት የፖለቲካ ልዩነት ያላቸው ሰዎች ብቻ ሙስና ፈጽመዋል ተብለው ፍርድ ቤት እንደሚቀርቡ ይናገራሉ፡፡

‹‹በሙስና የተዘፈቀ ኃይል ራሱን መልሶ መቅጣት የሚችል አይመስለኝም፤ በሙስና የተዘፈቀውን እዋጋለሁ ቢል የሚጀምረው ከራሱ ነው፤›› በማለት መንግሥት በሙሰኞች ላይ ዕርምጃ ለመውሰድ የተቸገረበትን ምክንያት አቶ ገብሩ ይጠቅሳሉ፡፡ እርሳቸው እንደሚሉት የመንግሥት ቀኝ እጆችና የሥልጣን መሠረት የሆኑትን እነዚህን ባለሥልጣናት መቅጣት በሥልጣኑ ላይ ስጋት ስለሚፈጥርበት ሊሆን ይችላል መንግሥት ዕርምጃ ከመውሰድ የሚቆጠበው፡፡ ‹‹ነፃነት በሌለበት፣ ዲሞክራሲያዊ መብቶች ባልተጠበቁበት፣ የሕግ የበላይነት በሌለበት ሁኔታ ሙስናን መቅረፍ ያስቸግራል፤›› በማለት ሙስና ከፖለቲካ ጋር ተያያዥነት ያለው ጉዳይ መሆኑን አቶ ገብሩ ይገልጻሉ፡፡

አቶ ስየ አብርሃ በሙስና ተጠርጥረው ከታሰሩ በኋላ ሙስና የፖለቲካ ጉዳይ ተደርጐ መወሰዱን የሚናገሩት አቶ ገብሩ፣ በአቶ ስየ ላይ የተወሰደው ዕርምጃ ‹‹ሙስናን እየፈጸምክ ሥርዓቱን ካልተቀናቀንክ እንደፈለግክ መኖር ትችላለህ፡፡ የእኔን ሥርዓት ከተቃወምክ ግን ሙስና እንኳን ባትፈጽም በሙስና ከስሼ አሳስርሃለሁ፤›› የሚል መልዕክት ያዘለ መሆኑን ያስረዳሉ፡፡

በእርሳቸው እምነት የስየ ‹‹ሕግ›› ተብሎ በአንዳንዶች የሚጠራው ሕግ በችኮላ በፓርላማ ፀድቆ ለፖለቲካ መሣርያነት መዋል ከጀመረ በኋላ፣ ሙስና የመፈክር ጉዳይ ሆኖ ቀርቷል፡፡ ሙሰኞችም የሚበረታቱበት ሁኔታ ተፈጥሯል፡፡

በአንዳንድ አገሮች ፀረ ሙስና ተቋም የሚቋቋመው ሙስናን ለመዋጋት ቁርጠኝነት አሳይተዋል የሚል እሳቤን ለመፍጠር እንጂ ሙስናን ለመታገል ታስቦ አለመሆኑን የሚናገሩት አቶ ገብሩ፣ ገዢው ፓርቲ ኢሕአዴግ ከልቡ ሙስናን ለመዋጋት ከፈለገ ሙስናን ለመታገል የሚያስችሉ መብቶችን ሊያከብር እንደሚገባ ያስገነዝባሉ፡፡ ከመብትና ከነፃነት ጋር በተያያዘ በአገሪቱ ያለውን ችግር ሲገልጹም የአንዳንድ አገሮች ሕዝቦች ‹‹ባለሥልጣናቱ የአገሪቱን ሀብት እየመዘበሩ ነው፤›› በማለት፣ ሰላማዊ ሠልፍ ወጥተው ዕርምጃ እንዲወስድባቸው የሚጠይቁ መሆኑን ኢትዮጵያ ውስጥ ግን ሰላማዊ ሠልፍ መውጣት መንግሥትን ለማፍረስ እንደመሻት ተደርጐ ስለሚታሰብ፣ ይህንን መብት ተጠቅሞ ለውጥ ለማምጣት አለመቻሉን ይገልጻሉ፡፡

ከሕወሓት ክፍፍል በኋላ ሙስናን እንዋጋ የሚለው መፈክር ጐልቶ መውጣቱን የሚያስታውሱት አቶ ገብሩ፣ ሕዝቡ የመንግሥትን ፕሮፓጋንዳ አምኖ ሥር ነቀል ዕርምጃ ይወሰዳል ብሎ የሰነቀው ተስፋ ከተስፋ በላይ አለመዝለሉን፣ እንዲያውም በከፋ መልኩ ሙስና አእየተስፋፋ መምጣቱን ይናገራሉ፡፡

‹‹አንድ ሙስና የፈጸመ ሰው የመንግሥት ደጋፊ ነኝ እስካለ ድረስ ከአንድ መሥርያ ቤት ወደ ሌላ መሥርያ ቤት እንዲዛወር ይደረጋል፡፡ ወይም ከማዕከላዊ ኮሚቴ ገለል ብሎ ይቆይና ከጊዜ በኋላ ደግሞ ሌላ ሥልጣን ይሰጠዋል፡፡ በኢሕአዴግ ጊዜ ሙስኛ ሳይሆን ሙስናን የሚያጋልጠው ነው የሚፈራው፤›› በማለት በትግራይ፣ በኦሮሚያ፣ በአዲስ አበባና በሌሎችም ክልሎች በሙስና ተባርረዋል የተባሉ ሰዎች ሹመት አግኝተው ሲንቀሳቀሱ እንደሚታዩ ይናገራሉ፡፡

የአንድነት ለፍትሕና ለዲሞክራሲ ፓርቲ ሊቀመንበር ዶ/ር ነጋሶ ጊዳዳም በአቶ ገብሩ ሐሳብ ይስማማሉ፡፡ እርሳቸው ፕሬዚዳንት በነበሩበት በ1989 ዓ.ም. የቀድሞ ድርጅታቸው ኦህዴድ ባደረገው ግምገማ በርካታ የድርጅቱ አባላት፣ ካድሬዎችና የፓርላማ ተመራጮች በሕገወጥ መንገድ ሀብት ማካበታቸው ስለታወቀ ‹‹ከየት አመጣችሁት?›› ተብለው ሲጠየቁ ምንም መልስ መስጠት አለመቻላቸውን የስታወሱት ዶ/ር ነጋሶ፣ ግምገማውን ተከትሎ በሙስና ተዘፍቀው የተገኙ ከአሥር ሺሕ በላይ ካድሬዎች እንዲባረሩና የተወሰኑትም እንዲታሰሩ ቢወሰንም፣ ከአራት ዓመት በኋላ በ1993 ዓ.ም. እነዚያ የተባረሩና የታሰሩ ሰዎች ተፈትተው ወደ ድርጅቱ እንዲመለሱ መደረጉን ይናገራሉ፡፡

ሰኔ 15 ቀን 1993 ዓ.ም. ሥልጣን ከመልቀቃቸው በፊት በነበሩት ቀናት በተካሄዱ የማዕከላዊ ኮሚቴ ስብሰባዎች ላይ በሙስና በተገኘ ገንዘብ ቪላዎችን እንደሠሩ የሚወራባቸው የመንግሥት ባለሥልጣናት ጉዳይ እንዲታይ ያቀረቡት ጥያቄ ተቀባይነት ሳያገኝ መቅረቱንም ዶ/ር ነጋሶ ያስታውሳሉ፡፡ እርሳቸው እንደሚሉት ገዢው ፓርቲ ኢሕአዴግ በሙስና ላይ ቁርጠኛ አቋም የሌለው መሆኑንም በግንቦት 1993 የኦህዴድ ስብሰባ ተገንዝበዋል፡፡ በዚሁ የኦህዴድ ስብሰባ ላይ ስብሰባውን ሲመሩት ከነበሩት ከጠቅላይ ሚኒስትር መለስ ዜናዊ ጋር በሻይ የዕረፍት ሰዓት ላይ በተገናኙበት ወቅት በሙስና የተዘፈቁ ባለሥልጣናት ጉዳይ እንዲታይ ላቀረቡላቸው ጥያቄ፣ ‹‹እያንዳንዱን እየተከታተልን መረጃ የምናገኝበት ሁኔታ አስቸጋሪ ስለሆነ ይህንን [የሙስና] ጉዳይ በሰዎች ላይ ማንሳት ይከብዳል ለውጥ ማምጣት የሚቻለው ኅብረተሰቡን በማስተማር ነው፤›› የሚል ምላሽ እንደሰጧቸው ያስታውሳሉ፡፡ አያይዘውም ‹‹የእኔ አቋም ዕርምጃዎችን ካልወሰድን ሌላውን ኅብረተሰብ የማስተማር ሞራል ሊኖረን አይችልም የሚል ነበር፡፡ ይህ ባለመሆኑም ሙስና ተንሰራፍቷል፤›› በማለት በሙስና ወንጀል የተዘፈቁ ሰዎች ላይ ዕርምጃ አለመወሰዱ ምን ያህል በአገሪቱ ላይ ችግር እንደፈጠረ ዶ/ር ነጋሶ ያስረዳሉ፡፡

የሥነ ምግባርና የፀረ ሙስና ኮሚሽን የሥነ ምግባር፣ ትምህርትና ኮሙዩኒኬሽን ጉዳዮች ዳይሬክቶሬት ዳይሬክተር አቶ ብርሃኑ አሰፋ በበኩላቸው፣ ሙስና በባህሪው ሚስጥራዊነቱ ተጠብቆ ሥልጣኑና ሀብቱ ባላቸው ታስቦበት የሚፈጸም ድርጊት በመሆኑ፣ በአሁኑ ወቅት ሙስና ያለበትን ደረጃ በተጨባጭ ለማወቅ እንደሚያስቸግር ለሪፖርተር ገልጸዋል፡፡

ብዙውን ጊዜ በሙስና ላይ ጥናት የሚያደርጉ ድርጅቶች በሰዎች አስተሳሰብ ላይ ተመሥርተው መረጃ እንደሚሰበስቡ የሚናገሩት አቶ ብርሃኑ፣ የሰዎች አስተሳሰብ ቦታ የለውም ባይባልም የእነዚህን ሰዎች አስተሳሰብ ተመርኩዞ በእርግጠኝነት ‹‹ሙስና ጨምሯል ወይም ቀንሷል›› ማለት እንደሚከብድ ያስረዳሉ፡፡

እርሳቸው እንደሚሉት ፀረ ሙስና ኮሚሸን ከተቋቋመ በኋላ ሙስናን በሚመለከት በአገሪቱ የታየውን ለውጥ በጥናት ማወቅ አስፈላጊ ሆኖ በመገኘቱ፣ በዓለም ባንክ ድጋፍ ፀረ ሙስና ኮሚሽን ኪሊማንጃሮ ኢንተርናሽናል ከተባለ ድርጅት ጋር በመሆን ጥናት እያካሄደ ነው፡፡ ‹‹[አጥኚዎቹ] የሰበሰቡትን መረጃ የመተንተን ሥራ ውስጥ ነው ያሉት፡፡ ጥናቱ ሙስና ጨምሯል ወይስ ቀንሷል የሚለውን የኅብረተሰቡ አስተሳሰብ ሊያሳየን ይችላል፤›› ይላሉ፡፡

የአገሪቱ ኢኮኖሚ በሚንቀሳቀስበትና ብዙ ገንዘብ ወጥቶ በርካታ የልማት ሥራዎች በሚከናወኑበት ጊዜ የሙስና አጋጣሚዎች እየሰፉ ሊሄዱ እንደሚችሉ የሚጠበቅ መሆኑን የሚገልጹት አቶ ብርሃኑ፣ ችግሩን ለመቅረፍ ጥናቱን አይቶ መወሰን እንደሚጠይቅ ይናገራሉ፡፡

አቶ ብርሃኑ እንደሚሉት ኮሚሽኑ በተቋቋመ በአሥር ዓመት ጊዜ ውስጥ ሙስናን በመከላከልና ሕግ በማስከበር ረገድ መልካም ውጤቶችን ያስመዘገበ ቢሆንም፣ ኅብረተሰቡ በሚጠብቀውና ኮሚሽኑ በሚያስመዘግበው ውጤት መካከል ክፍተት ስላለ ጠንክሮ መሥራት ይጠበቅበታል፡፡

ፀረ ሙስና ኮሚሽን በሙስና ወንጀል የተዘፈቁ ከፍተኛ ባለሥልጣናትን ከሶ ወደ ፍርድ የማቅረብ አቅም የለውም ተብሎ በአንዳንድ አስተያየት ሰጪዎች የሚሰነዘሩት ትችቶችም መሠረተ ቢስ ውንጀላ መሆናቸውን አቶ ብርሃኑ ይገልጻሉ፡፡

‹‹አንድ ሰው ባለሥልጣን ስለሆነ የግድ መክሰስ ያለብን አይመስለኝም፡፡ ጉዳዩ የሚያስጠይቀው ከሆነ ማንም ሰው ይጠየቃል፡፡ ከዚህ ቀደምም ሆነ በቅርቡ የጠየቅናቸው ባለሥልጣናት አሉ፡፡ ባለሥልጣን ለመክሰስ ብቻ ብለን ግን የምንሠራው ሥራ የለም፤›› በማለት ኮሚሽኑ ሰዎችን የሚከሰው በሙስና ወንጀል ተጠያቂ ሊሆኑ ይችላሉ ብሎ ሲያስብና መረጃ ሲኖረው ብቻ መሆኑን ያብራራሉ፡፡

Continue reading …

አንድ በአንደኛ ደረጃ ት/ቤት የሚማር ተማሪ ለአባቱ ‹አባዬ፣ በት/ቤታችን ነገ የሚቀርበውን የምትሃት ትርዒት ለማየት ሦስት ብር ክፈሉ ተብለናልና ስጠኝ› ይለዋል፡፡ አባትም ‹አዬ ልጅነት፣ እኔ አባትህ በአምስት መቶ ብር ደመወዝ ይህን ሁሉ ቤተሰብ ወር እስከ ወር ቀጥ አድርጌ መያዜ ራሱ ምትሃት አይደለም? ታዲያን እዚሁ እቤትህ እኔ አባትህ ምትሃት እያሳየሁህ የምን ገንዘብ ከፍሎ ማየት ነው?› ይለውና ለምትሃት ቀርቶ ለዳቦም የሚሆን ሣንቲም ለማግኘት መቸገሩን ያረዳዋል ፤ ማስረዳት ጥንት ያኔ በደጉ ዘመን በመቅረቱ፡፡ ዛሬ ዛሬ ማርዳት እንጂ ማስረዳት የለም፡፡

የሀገራችን ኑሮ ጦፏል፡፡ ከቃላት የመግለጽ አቅም በላይ ተቃጥሏል፡፡ በዚያም ምክንያት ብዙው ዜጋ የሚያደርው ጠፍቶት እንዲሁ ፈዝዟል፡፡ ይህን ያህል ምን እንዳነሆለለን አይገባኝም፡፡ አዲስ አበባ ውስጥ በምትሃት የሚተዳደረው ሰው እጅግ ብዙ ነው፡፡ የደመወዙን መጠን የምናውቀው ሰው – ከሦስት ቀናት ያልበለጠ ሊያኖረው እንደማይችል የምንረዳው ብዙ ደመወዝተኛ – በማይገባን ምሥጢር በየቀኑ መጠጥ አፉ ላይ ለግጦ እናየዋለን፤ የ120 ብር ኪሎ ሥጋ ከባልንጀሮቹ ጋር ሲቀረጥፍም  እናስተውላለን፡፡ የተሻለ ደመወዝ አለን የምንል ደግሞ ከቤታችን ሥጋና ቅቤ ከጠፉ ዓመታት ተቆጠሩ – በተለይ ከ97 ምርጫ በኋላ፡፡ ውጪ ማምሸትም ከብርቅነት ተቆጠረ – የቤት ሽሮ ሳይሟላ እንዴት ተደርጎ ውጪ ይመሻል? የወጉን ለማድረስና የሃሳብን ትርምስምስ ከወዳጅና ጓደኛ ጋር ተካፍሎ አእምሮን ፈታ ለማድረግ ከውስኪና ቢራ የሚወርዱ የወራጅ ቀጣና አባላት በየሀበሻ አረቂ ቤቱ ሲያውካኩ ያመሻሉ – እናመሻለን፤ ሌላ ምን ምርጫ አለን? አለበለዚያ በሃሳብና ጭንቀት ድርና ማግ ተተብትበን መውጫ በማጣት ልናብድ እንችላለን፡፡ የዚህ ዓይነቱ የተመሰቃቀለ ሕይወት መነሻው ምሥጢር ሆኖብናል፡፡

አዲስ አበባ ውስጥ ሕይወት ፈርጀ ብዙ ናት – እንደማንኛውም ከተማ ሁሉ፡፡ የኑሮ ልዩነቱ ግን ከየትኛውም ሀገር የሚብስ እንጂ የሚስተካከል እንኳን አይደለም፡፡ አንድ ሰው በአንድ ቀን አዳር እንዴት አንቱ የተባለ ቱጃር ወይም ሙልጭ የወጣ ድሃ እንደሚሆን ዕንቆቅልሽ ነው – የማይገባ፡፡ ከተማዋ ውላ የምታድረው በፈጣሪ ጥበብና ጥበቃ እንጂ አስተዳዳሪ ያላት አትመስልም፡፡ ጉልበተኛ ከሆንክ ሁሉም ነገር አለህ፡፡ ፈሪሃ እግዚአብሔርና ጤናማ ኅሊና ካለህ ከእግዚአብሔርና ከጤናማ ኅሊና በስተቀር ምንም የለህም፡፡ እነዚህ ደግሞ በንጹሕ ኅሊና እንድትደሰት ያደርጉህ ይሆናል እንጂ ለቁሣዊ ሕይወትህ ደንታ ያላቸው አይመስሉም፡፡ እናም ነፍስህ በንጽሕናዋ ልትደሰት ብትችልም በተወሰነ መልኩ ሥጋህ ሊከፋብህና በፈተናም ልትከበብ ትችላለህ፡፡ ያኔ ፈጣሪና ንጹሕ ኅሊና ሊከዱህ ዳር ዳር ይላሉ፡፡ በሠፊው መንገድ ልታመራ ከቆረጥህ ሰው የመሆንህን አንጡራ ሀብት ትቀማና የሁሉም ቁሣዊ ሀብቶች ባለቤት የምትሆንበትን ዘዴና ብልኃት ከቢጤዎችህ ትማራለህ፡፡ ከዚያ አዲስ አበባን በቀንና በሌሊት በሽንጣም ዘመናዊ አውቶሞቢል እየተሸከረከርህ መምነሽነሽ ነው፡፡ ነገ ለራሱ ይጨነቅበታል – አንተ ለምንም መጨነቅ ሣይኖርብህ በሚሊዮኖች ወገኖችህ ደምና ወዝ መደሰት ብቻ ነው የሚጠበቅብህ፡፡ ነጋዴም ሁን፣ ፖለቲከኛም ሁን፤ ተቀጣሪ ሠራተኛም ሁን፣ ዋናው ኀሊናህን እቤትህ አስቀምጠህ ሆድህ ያዘዘህን መፈጸም ነው፡፡ ለዚያ ደግሞ እንደግብኣት ዘውገኝነትና ጠባብ ብሔርተኝነት ዋስ ጠበቃ እንደሚሆኑህ ዐውቀህ እስከጥግ ልትጠቀምባቸው ይገባሃል፡፡ በሌላ በኩል ሰፋ ያለ የኢትዮጵያዊነት አስተሳሰብ እንዳይኖርህ መጠንቀቅ አለብህ – ይሄ ዓይነቱ አስተሳሰብ ለዕድገትህ ፀር ነው፡፡ በሀብት ሽቅብ ለመስፈንጠር የኢትዮጵያን ስም በፍቅርና በቅንነት ካነሳህ ወዮልህ! ‹በማን ላይ ቆመሽ ወያኔን ታሚያለሽ› የሚለውን አዲስ ተረትና ምሣሌ ማጤን ይጠበቅብሃል፡፡ የምትከብረው በኢትዮጵያና በኢትዮጵያውያን ወጪና ኪሣራ መሆኑን ካልተረዳህ ሁሉንም የምትቀማበት ዘመን እንደሚመጣ ዕወቅ – በኢትዮጵያ ውስጥ ዛሬ የምትከብረው ከአስብቶ አራጆች ጋር ተስማምተህና ተሞዳሙደህ እስከቀጠልህ እንጂ ጉዳይህ ሲሞላ ሸርተት የምትል ከሆንክ ተዘጋጅተው ከሚጠብቁህ የማጥቂያ ካርዶች ባንደኛው ዘብጥያ ትወርዳለህ፤ የቁሣዊ ዕድገትህ ምንጭ የወያኔ ችሮታ የታከለበት ያንተው ኅሊናቢስነት  እንጂ የብቃት ደረጃህ ከፍተኛነት እንዳልሆነ ካልተረዳህ ተጎጂ ነህ፡፡ በብፅዕና መክበር የለም – በዚህ ዘመን የሚከበረው ራስን ከድቶ ኅሊናን ለባዕድ አስተሳሰብ ካስገዙ ብቻ ነው፡፡ ይህ ውርደታዊ ዕድገት ጥንትም ነበር፤ አሁንም አለ፡፡

ትናንት አለቤሾው ላይ አዘጋጁ አለባቸው ተካ በፕሮግራም መግቢያነት ይጠቀምባት የነበረችውን  ኩሽና እምትመስል ጢስ የጠገበች ደሳሳ ጎጆ ውስጥ በኪራይ ሲኖር የነበረ ሰው ዛሬ የመዋኛ ገንዳና ጃኩዚን የተባሉ የቅንጦተኛ ኑሮ መገለጫዎች የተሟሉለት የተንጣለለ አውሮፓዊ ግቢ ውስጥ አኗኗሩን እንኳን በቅጡ ሳያውቅበት  ትናንትናና ከትናንት በስቲያ ድሃ ከነበረ ቤተሰቡ ጋር ሲኖር ብታይ መቅናት የለብህም፡፡ አንተም እርሱን የመሆንና ያለመሆን መብት ስላለህ በምንም ነገር ልትቀና አይገባህም፡፡ ኑሮ በአዲስ አበባ ዕንቆቅልሽ መሆኑን ተገንዝበህ ነፍስህን አውለህ ለማሳደር መታገል ወይም ‹ጅብ ከሚበልህ በልተኽው ተቀደስ › በሚለው የሆድ አደር መመርያ መሠረት የነበረህን ዓላማ – ከነበረህ-  ቀይረህ ወደሀብቱ ተራራ መጓዝ ነው፡፡ አትጠራጠር – ይሳካልሃል፡፡ ግን ጸሎትህንና እምነትህን ካልለወጥህ አይሆንልህም፡፡ በነጻ እሚገኝ ነገር የለም፡፡…

ጸሎትህ ባጭሩ ይህን ይምሰል፡- ‹ አቤቱ ወያኔ ሆይ በጠበንጃ ጫፍ የምትኖር ደደቢታዊ መንፈስህ ትባርከኝ፡፡ ስምህ በዲያቢሎስ መንግሥት ገናና እንደሆነ ሁሉ በእኔም ቤት እንደዚያው እንዲሆን ፈቃድህ ይሁንልኝ፡፡ ከሀብት ማግኛ ጠላቶቼ ከመድረክና ቅንጅት ብሔራዊ መናፍስት እንዲሁም እነሱ ከሚያቀነቅኑት የኢትዮጵያዊነት አባዜ  በኪነ ልደትህ ወሞሼህ ጠብቀኝ፡፡  ዐይኔ ያየውን መኪና ሳልነዳ፣ የልጆቼን እናት አሮጊት ሚስቴን ፈትቼ ቀልቤ ያረፈባትን ውብ ኮረዳ ሳላገባ፣ ልቤ በተመኘው ምግብና መጠጥ ሁሉ ሳልደሰት፣ ለትውልድ የሚተርፍ ገንዘብ በባንክ ሳላከማች… በጅምር እንዳልሰናከል የዐድዋና የአክሱም ወያኔያዊ አበጋሮች ተለምነውኝ ጸሎቴ በወያኔ/ኢሕአዴግ መንበረ ሣጥናኤል ውኩፈ ለይኩን ይሁንልኝ፡፡ አሜን፡፡ › ጸሎትህ አጠር ይበል – ሲንዛዛ ደግ አይደለም – ያስጠረጥርሃል፤ ያስመነጥርሃልም፡፡

አዲስ አበባ ላይ ኑሮ በዘመናዊ የምፀት አገላለጽ ‹አሸወይና› እንደሆነች አየን፡፡ የኑሮ ዕንቆቅልሹ ከአእምሮ በላይ እንደሆነም በጣም ባጭሩ ተመለከትን፡፡ የዛሬ ሕይወቱን ለነገ ለማሳደር አቅሉን ስቶ የሚራወጥባት አዲስ አበባ በዚያው ልክ ሳይሠራና ሳይለፋ ሕይወት ቀኝ በቀኝ የሆነችለት ዘራፊና ሌባም ብዙ ነው፡፡ ቀን ቀን በከተማዋ የሚርመሰመሱትን መኪኖችና ካለአንዳች ሥራ በሥራ ሰዓቶች በየአደባባዩና በየሥፍራው የሚንቀሳቀሰውን የሰው ብዛት ስታዩ ‹ይህ ሕዝብ ሥራ የሚሠራው መቼ ነው? ሌሊት ሌሊት ይሆን እንዴ?› ብላችሁ ልትጨነቁና ይህ ሁሉ ዜጋ ሥራ የሌለው ይሆን ይሆናል ብላችሁ የምትገምቱ ከሆነ ደግሞ ‹ታዲያ ማንስ ነው ሠርቶ የሚያኖረው?›  ልትሉ ትችላላችሁ፡፡ አስጨናቂ ሀገራዊ ምስል ተደቅኖብናል፡፡ እንዴት ይወገዳል? ወደፊት የምናየው ይሆናል፡፡ ነገሩ ግን የጊዜ ጉዳይ ካልሆነ በስተቀር የኑሮ ውድነቱ ብቻ አንድ ቀን የሚፈነዳና ሀገሪቱን ለከፋ ምስቅልቅል የሚዳርግ ስለመሆኑ ሳይታለም የተፈታ ነው፡፡ የኑሮ ውድነቱ ከቀን ቀን እየናረ ባለበት ሁኔታ ገንዘብ የሚያጋብሱት ዜጎች ደግሞ ከአጠቃላዩ ሕዝብ ሲነጻጸሩ እጅግ ኢምንት የመሆናቸው ነገር ተደማምሮ ቀውሱን እንደሚያፋጥኑት የታመነ ነው፡፡ የሚገርም ወቅታዊ ሁኔታ!!

የመኪናውን ነገር ስናነሳ መርሳት የሌለብን ነገር አለ፡፡ በቻይና ዋና ከተማ አምስት ሚሊዮን የሚጠጉ መኪኖች ሲርመሰመሱ በአዲስ አበባ ከሁለት መቶ ሺህ የሚያንሱ እንደሆነ እንሰማለን፡፡ ያበዛቸው ታዲያ ምኑ ነው? ብለን ስንጠይቅ መልሱ የመኪና መንገዱ ጥበት እንደሆነ እንረዳለን፡፡ አንድ ሺህ ለሚደርሱ መኪኖች የተሠሩ መንገዶች ለዚህ ከሌሎች ሀገሮች ጋር ሲወዳደር ኢምንት ለሆነ የመኪና ቁጥር ሊበቁ አልቻሉም፡፡ በዳዴ በምትሄድ ሀገር መቶ ሺና ሁለት መቶ ሺ መኪኖች ብዙ ናቸው፡፡ አሁን አሁን ሰውና መኪና እየተጋፋ መሄድ ጀምሯል፡፡ ያደጉ አገሮች አራትና አምስት ንብርብር መንጎዶች ሲሠሩና ዕድገታቸውን ጠብቀው ሲተሙ ከአፍ እስከ አፍንጫቸው አርቀው የማያስቡት የኛ መንግሥታት እንደኤሊ በሚጎተት የዕድገት ትልማቸው ሰውና መኪናን የሚለይ መንገድ ሊሠሩ አልቻሉም፤ ሠራን ቢሉም የተሠራውና የሚሠራው ከዕድገቱ ጋር ሊመጣጠን አልቻለም – በየቀኑ በብዙ መቶዎች ምናልባትም በሺዎች ለሚገባ መኪና የሚሠራው መንገድ ግን በተለይ አሁን አሁን የተቦረቦረን አስፋልት ከመለጠፍና የመንገድ ደሤቶችን ከማስዋብ የዘለለ አይደለም፡፡ በዚሁ ያልተመጣጠነ ሙከራቸው ሲኮፈሱና ሲመጻደቁ ማየት ደግሞ እጅግ ያሳዝናል፡፡ ሠርቶ ችግርን ካስወገዱ በኋላ መኩራራት የተገባ ነበር፡፡ ግን ለአፍዝ አደንግዝ የፕሮፓጋንዳ ፍጆታ ሲባል በሚዲያ ጆሮን እየደጋገሙ መጠለዝ አግባብ አይደለም፡፡ አሥራ አምስት ደቂቃ ለማይፈጅ መንገድ ከአንድ ሰዓት በላይ እየፈጀን ሥራ የሚረፍድብንና ከአለቆቻችን የቃል ግሣጼና የጽሑፍ ማስጠንቀቂያ የሚደርስብን ዜጎች ይህ የመንገዶች መስፋፋት ዜና ለኛ ቀልድ ነው፡፡ አልተሠራም ማለት ግን አይደለም – ችግሩን ሊቀርፍ በሚችል ሁኔታ አልተሠራም ነው የምንለው፡፡ በየቦታው ማነቆ ነው፡፡ ማስተንፈሻዎች በበቂ አልተሠሩም፡፡ ከአሁን በኋላም ወደላይና ወደታች ካልሆነ በስተቀር የጎንዮሽ የመንገድ ሥራ አያዛልቅም፤ ከጥቅሙ ጉዳቱ ያመዝናልና፡፡ ትርፉ ቤት ማፍረስ ብቻ ነው፡፡ እስከመቼስ እያፈረሱ መቀጠል ይቻላል? ብሎ ብሎ ሁሉም እኮ ሊፈርስ ነው፡፡

የመንገዱ ጉዳይ እዬዬም ሲዳላ ዓይነት ነው፡፡ አሁን ማንቁርታችንን ይዞን ያለው የኑሮ ውድነቱ ነው፡፡ በነጋሪት ጋዜጣ ወይም በኤሌክትሮኒክስ ሚዲያ በግልጽ ባልታወጀ ጦርነት እያለቅን ነን፡፡ እየኖሩ ያሉት ጥቂቶች ናቸው፡፡ ብዙዎቻችን ሞትን በሚያስመኝ ሁኔታ በኑሮው እያለቀስን እንገኛለን፡፡ ብዙ የምግብ ዓይነቶች ከመወደዳቸው የተነሣ ከብዙዎቻችን የቀድሞ ደህና ኗሪዎች የምግብ ዝርዝር ተሠርዘዋል፡፡ ለምሣሌ ቅቤና ሥጋ ጥርዥ ብርዥ ሲሉ ቆይተው ለይቶላቸው ከኔ ቤት ከተሰናበቱ ሦስት ወራት ተቆጠሩ – ብርቱካንንም፣ ወተትንም፣ ሙዝንና ሌሎቹንም ጠቃሚ የምግብ ይዘቶች አስከትለው፡፡ ይህ የኔ ችግር የቅንጦት ነው፡፡ በሌሎች ቤቶች ደግሞ ኪሎው ከአሥራ አምስት ብር በላይ የሚሸጠው ሽምብራ ጠፍቶ ለከፋ ርሀብ የተጋለጡ እንዳሉ ዐውቃለሁ፡፡ ርሀብ ደግሞ ጊዜ አይሰጥም፡፡ መሪያችን በሀገራችን ርሀብ የለም ይበሉ እንጂ ሁላችንም ርሀብተኞች ነን፡፡ ርሀብ ደግሞ ፍቺው እንደዬሀገሩ ይለያያል፡፡ ነፍስ ውሎ ስላደረ ብቻ አንድ ሰው አልተራበም አይባልም፡፡ እኔ ራሴ የርሀብ ተጠቂ መሆኔን ማስረዳት እችላለሁ፡፡ አንድ በሠለጠነው ዓለም የሚገኝ የማይራብ ዜጋ በቀን የሚያገኘውን የምግብ ራሽን አገኛለሁ ወይ? ብዬ ራሴን ስጠይቅ የማገኘው መልስ ‹ተሼ፣ ለምን ትቀልዳለህ? የምን መቀናጣት ነው? በብረት የከበረ የጥቁር ጤፍ እንጀራ ከዶኬ ወጥህ ጋር ካገኘህ የምን ፕሪሞ ሴኮንዶና ቴርዞ፣ የምን ሥጋ፣ወተት፣ዕንቁላል፣ዓሣ፣ፓስታሹታ፣ቪልኮተሌት፣ስካሎፕ፣አኜሎዲቢቴሎ፣ፓይ፣ቤከን፣ቋሊማ፣ ስቴክ፣ ሙዝ፣ቴላቴሊ፣ሞርታዴላ፣ላዛኛ፣ሩዝ፣ብርቱካን፣ማንጎ፣ፓፓያ፣ሙዝ፣ፖም፣ለውዝ፣ዙኪኒ፣ሾርባ፣…(የስንቱን ወስፋት አላውሼው ይሆን – ይቅርታ፤ ብቻ የምግብ ሰዓት አይሁን) … ጌታው ተው እንጂ…› የሚል ነው፡፡ አዎ፣ ከዚህ አንጻር ከተመለከትነው የርሀብተኛውን ቁጥር፣ ቁጥር አይገልጸውም፡፡ 99 በመቶ የምንሆነው ዜጎች የኗሪ አኗኗሪ ስለመሆናችን የሚነገርልን እንግዲህ ከዚህ መሠረታዊ ጭብጥ በመነሳት ነው፡፡ እናስ የኔ ርሀብተኝነት ተገለጠላችሁ ይሆን አሁን? እንጂ መኖር ከተባለማ ዐይናቸው ሳያይ ዕጃቸው የገባላቸውን የገዳም አካባቢ ቅጠል እየሸመጠጡ በቀን አንዴ የሚቀምሱት የበቁ አባቶችስ ይኖሩ የለምን? የነሱ በምርጫ – የኛ መንግሥታችንና መንግሥታዊ ዕጣችን በጣሉብን ግዴታ መሆኑ ነው ልዩነቱ፡፡ እናም በአሸር ባሸር ምግብ ሆድን ቆዝሮ ዐይጥ የዋጠ እባብ መስሎ መንቀሳቀስ በቅጡ መኖርን እንደማያመለክት መገንዘብ ያሻል፡፡ ለነገሩ ይሄም ከጠፋ ሰነባበትን፡፡ የአሁኑ ብሶ ቁጭ አለ፡፡

የኑሮ ውድነት ከተነሣ ዘንድ የሚከተሉትን የግንባታ ዕቃዎች የወቅቱን ዋጋ ከአሥር ዓመት በፊት ከነበራቸው ዋጋ ጋር እያነጻጸርኩ ልግለጽላችሁ፤ በዚያውም በአሁኑ ወቅት የደረስንበትን የብር የመግዛት አቅም ግሽበትና ቤት የሚሠራው ማን ሊሆን እንደሚችል ትረዳላችሁ፡፡ በልተውት አንጀት ጠብ የማይል አንድ ተራ የፍስግ ምሣ በአማካይ ብር 35 በሆነበት ዘመን፣ የተሸቀበ አንድ ኪሎ ጥብስ ወይ ጥሬ ሥጋ በአማካይ 100 ብር በሆነበት ዘመን፣ ጭብጥ ባቄላ ገዝቶ አፍን ለመሻር ከበቆልት አዟሪዎች ከአምስት ብር በላይ መክፈል በሚያስፈልግበት ዘመን፣ ሻይና ቡና ጠጥተህ በደጉ ዘመን ለቁርጥና ለውስኪ ከምታወጣው ገንዘብ የበለጠ በምትጠየቅበት ወቅት፣ ሥጋ መግዛት ይቅርና በሉካንዳ በር ካለፍክ ሥጋን ለማየት ገንዘብ የምትከፍልበት ጠማማ ዘመን በግምባር እየመጣ ባለበት አስቸጋሪ ወቅት፣… ላይ እንገኛለን፡፡ ይህን ጉድ ዘመን ለልጆቻችን እናወርሳለን ወይንስ የተሻለ አማራጭ ይኖረናል? እናስብበት፡፡

ተ.ቁ	የዕቃው ስም	መለኪያ	የአሁን ዋጋ(በችርቻሮ)	በ90ዎቹ መጀመሪያ አካባቢ
1	ስሚንቶ	ኩንታል	350 ብር	50 ብር
2	አሸዋ	ባለ16ሜ.ኩ	6000 ብር	1500 ብር
3	ጠጠር	››	5600 ብር	1400 ብር
4	ሽቦ	በኪሎ	30 ብር	30 ብር
5	ባለ8 ፌሮ	ቤርጋ	123 ብር	18 ብር
6	ባለ10 ››	››	195 ብር	28 ብር
7	ባለ 12 ››	››	275 ብር	31 ብር
8	ባለ14   ››	››	368 ብር	41 ብር
9	ባለ16	››	478	50 ብር
10	ምሥማር	ኪሎ	30 ብር	8 ብር
11	የቆርቆሮ ምሥማር	ኪሎ	45	10 ብር
11	አናፂ/ግምበኛ	የ ቀን ውሎ	ከ120 ብር በላይ	(ለማጁን) ከ15 ብር እስከ 30 ብር
12	ረዳት ወዛደር	››	ከ50 ብር በላይ	ከ5 ጀምሮ እስከ 15
13	ቆርቆሮ	32ጌጅ	ከ160ብር በላይ	38ብር
14	የውኃ ቀለም	ጋሎን	140 ብር	50 ብር

ልዩ ማስታወሻ፡- በኢትዮጵያ ከመኖር በለየለት ሲዖል ውስጥ መኖር ይሻላል፡፡ ይህን ወረቀት ጽፌ ከጨረስኩ በኋላ ለመላክ ስሞክር    ኢንተርኔት አይሠራም፤ ደጋግሜ ሞከርኩ አሁንም አይሠራም፡፡ መስመሩ ይገባል ነገር ግን ግንኙነት እንዳይኖር በቅጥረኞች    ድረገፅ   አምካኞቹ የቻይና ‹ዐይጦች› ታግዶኣል፡፡ በዚህች እንኳን እንዳንተነፍስ ያለብንን እመቃ ተመልከቱ፡፡ እንዲህ የሚሆነው ደግሞ       ዛሬ     ብቻ ሣይሆን ሁልጊዜ ነው፡፡ ከሌላው ሁሉ ይሄኛው ድርጊታቸው ይበልጥ ያሣርራል፡፡ ሳይሞቱ መከፈንን የመሰለ መጥፎ ነገር   የለም፡፡ ርሃብን በሆነ ነገር ማስታገስ ይቻል ይሆናል፤ ይህ ዓይነቱ የኅሊና ነጻነት ርሃብ ግን እጅግ ሲበዛ መሪር ነው፡፡ ሞትን       ያስመርጣል፡፡

Continue reading …